Avstriyada türk ailənin qapısına donuz başı qoyublar

Avstriyada irqçilik və islamofobiya zəminində baş verən hadisə narahatlıq doğurub.

Sonxeber.az xarici mediaya istinadən xəbər verir ki, Avstriyanın Tirol əyalətinə bağlı Hall in Tirol qəsəbəsində yaşayan türk ailə martın 12-də səhər saatlarında irqçi və müsəlmanlara qarşı yönəlmiş hücumun hədəfi olub. Kimliyi hələ müəyyən edilməyən şəxs ailənin evinin qarşısına donuz başı qoyub, eyni zamanda qapının kənarında Ramazan ayı və ailə haqqında təhqiramiz ifadələrin yer aldığı yazı buraxıb.

Hadisədən sonra ailə hüquq-mühafizə orqanlarına müraciət edərək hücumu törədən şəxsin tapılmasını tələb edib.

Zərərçəkən ailənin üzvü A.S bildirib ki, həyat yoldaşı sahurdan sonra işə getmək üçün qapını açarkən donuz başını görüb və qorxu içində qışqırıb. Onun sözlərinə görə, baş verən hadisə ailə üzvlərində, xüsusilə uşaqlarda ciddi narahatlıq yaradıb: "Artıq uşaqlar da qorxmağa başlayıb. Qapının lampası yanan kimi ora baxırlar və çox narahat olurlar."

A.S əlavə edib ki, artıq işə gedərkən uşaqları evdə tək qoymaqdan çəkinir: "Can təhlükəmizdən şübhə etməyə başlamışıq."

O, həmçinin polisin məsələyə yetərincə diqqət ayırmadığını düşündüklərini qeyd edib. Ailə təhlükəsizlik məqsədilə müşahidə kamerası quraşdırmaq istəsə də, polis bunun qanunla qadağan olunduğunu bildirib.

Faktla bağlı araşdırma aparılır.

Telegramda izləyin