Qadınlar məsciddə hicablarını açıb etiraz aksiyası keçiriblər - VİDEO

İstanbulda Qədir gecəsi münasibətilə keçirilən ibadətlər zamanı diqqətçəkən etiraz aksiyası baş tutub.

Sonxeber.az türk mediasına istnadən xəbər verir ki, hadisə Fatih məscidində qeydə alınıb. Bir qrup qadın məscidin daxilində hicab və yaylıqlarını yerə qoyaraq etiraz aksiyası keçirib. Bildirilib ki, aksiya Məscidül-Əqsanın 17 gündür bağlı saxlanmasına diqqət çəkmək məqsədi daşıyıb.

Etiraz zamanı qadınlar kişilərə müraciət edərək "Məscidül-Əqsa müsəlmanların namusudur, sahib çıxın" çağırışını səsləndiriblər.

Məlumata görə, İsrail tərəfi "regional təhlükəsizlik" səbəblərini əsas gətirərək müqəddəs məkanın qapılarını bağlayıb və müsəlmanların Ramazan ayı ərzində ibadət etməsinə məhdudiyyətlər tətbiq edib. Bildirilir ki, bu səbəbdən təravih və cümə namazlarının qılınmasına icazə verilməyib.

1967-ci ildə Qüdsün işğalından sonra ilk dəfə olaraq Ramazan ayında Məscidül-Əqsada təravih namazı və itikaf ibadətinin məhdudlaşdırılması dini və tarixi statusun dəyişdirilməsi cəhdi kimi qiymətləndirilir.

Məsələ ilə bağlı Ömər Çelik də açıqlama verərək İsrailin bu addımını kəskin şəkildə pisləyib. O bildirib ki, Məscidül-Əqsaya qarşı bu cür yanaşma ümumbəşəri dəyərlərə ziddir və müsəlmanların ibadət hüququnun məhdudlaşdırılması qəbuledilməzdir.

Telegramda izləyin