Sağlamlığımıza niyə laqeyd yanaşırıq? - AÇIQLAMA

Gündəlik həyatın sürəti, stress və müxtəlif psixoloji faktorlar bəzən insanları ən dəyərli şey - sağlamlıq qarşısında belə laqeyd edir.

Çoxları riskləri bilsə də, yenə də özünə zərər verən davranışlardan imtina etmir.

Bəs görəsən nədir bunun səbəbi?

Psixoloq G.Qədirli bu barədə Sonxeber.az -a açıqlama verib:

"İnsanların sağlamlıqlarını heçə saymasının arxasında bir neçə psixoloji səbəb dayanır. İlk növbədə, "mənə heç nə olmaz" düşüncəsi yəni riskləri kiçiltmə meyli geniş yayılıb. Bu, xüsusilə gənc yaşlarda daha güclü olur və insan özünü təhlükələrdən sanki "sığortalanmış" kimi hiss edir.

Digər tərəfdən, ani zövqlərin uzunmüddətli nəticələrdən üstün tutulması mühüm rol oynayır. Məsələn, zərərli qidalanma, siqaret və ya yuxusuzluq kimi vərdişlər qısa müddətdə rahatlıq və ya həzz versə də, onların gələcək təsirləri şüuraltı səviyyədə arxa plana atılır.

Psixoloji gərginlik və stress də burada əsas faktorlardandır. İnsan emosional yüklənmə yaşadıqda, özünə qayğı göstərmək əvəzinə, bəzən özünü "cəzalandıran" davranışlara yönələ bilir. Bu, daxili narazılıq, tükənmişlik və ya həyat üzərində nəzarəti itirmə hissi ilə əlaqəli olur.

Bəzi hallarda isə bu davranışlar aşağı özünə dəyər hissindən qaynaqlanır. İnsan özünü kifayət qədər dəyərli hesab etmədikdə, sağlamlığını qorumağa da motivasiya tapmaya bilər.

Sağlamlığa laqeydlik sadəcə məlumat çatışmazlığı deyil, daha çox psixoloji mexanizmlərin təsiri ilə formalaşan kompleks bir davranışdır. Bu səbəbləri anlamaq isə dəyişimin ilk addımı hesab olunur".

Telegramda izləyin