Kıvanç Tatlıtuğun yeni serialında baş rol problemi: Qadın obrazı üçün aktrisa hələ də tapılmayıb

Türkiyəli məşhur aktyor Kıvanç Tatlıtuğun baş rolunda çəkiləcəyi "Dönence" serialı hələ efirə çıxmamış aktyor seçimi ilə bağlı yaranan problem səbəbilə gündəmə gəlib.

Sonxeber.az türk mediasına istinadən xəbər verir ki, layihədə qadın baş rol üçün təxminən üç aydır axtarış aparılsa da, hələlik heç bir aktrisa ilə razılıq əldə olunmayıb.

Özdağ Film tərəfindən hazırlanan serialın rejissoru olaraq əvvəlcə Hilal Saral ilə razılıq əldə edilsə də, daha sonra layihəni Şenol Sönmez davam etdirib. Qadın baş rol üçün ilk olaraq Pınar Deniz ilə danışıqlar aparılıb. Lakin aktrisanın rejissor Nuri Bilge Ceylanın yeni filmində çəkilməyə üstünlük verməsi səbəbilə layihədən imtina etdiyi bildirilir.

Daha sonra Burcu Biricik ilə də görüşlər keçirilsə də, tərəflər arasında razılıq əldə olunmayıb. Hazırda çəkiliş qrupu uyğun namizəd axtarışını davam etdirir. Serialın çəkiliş tarixinin isə qadın baş rol təsdiqləndikdən sonra dəqiqləşəcəyi qeyd olunur.

Telegramda izləyin