İsrail əsgəri İsa heykəlini balta ilə parçaladı

Livanın cənubunda İsrailin nəzarəti altında olan Deyr Seryan qəsəbəsində baş verən hadisə böyük narazılıq doğurub.

Sonxeber.az xarici mediaya istinadən xəbər verir, sosial şəbəkələrdə yayılan görüntülərdə bir İsrail əsgərinin İsa heykəlini balta ilə parçaladığı əks olunub və bu görüntülər qısa müddətdə geniş rezonans yaradıb.

Hadisə Livanın cənubunda, sərhəddən təxminən 5-6 kilometr məsafədə yerləşən Deyr Seryan qəsəbəsində baş verib. Hadisənin dəqiq nə vaxt baş verdiyi açıqlanmasa da, yayılan foto və videolar beynəlxalq ictimaiyyətdə ciddi etirazlara səbəb olub.

İsrail ordusunun sözçüsü Nadav Şoşani məsələ ilə bağlı açıqlamasında görüntülərin araşdırıldığını bildirib. O qeyd edib ki, hadisə ilə bağlı ətraflı və dərin araşdırma aparılacaq.

Qeyd edək ki, İsrail ordusu martın 2-də Livana qarşı genişmiqyaslı hava hücumlarına başlayıb və ölkənin cənubunda bir sıra yaşayış məntəqələrini nəzarətə götürüb. Bu proses nəticəsində yüz minlərlə insan məcburi köçkünə çevrilib. Livan hökumətinin açıqlamasına görə, yerindən edilənlərin sayı 1 milyonu ötüb.

Bununla yanaşı, Livan və İsrail arasında əldə olunan 10 günlük müvəqqəti atəşkəs aprelin 17-də qüvvəyə minib. Lakin İsrailin Baş naziri Benyamin Netanyahu atəşkəsə baxmayaraq, cənubdakı nəzarətdə saxlanılan ərazilərdə qalmağa davam edəcəklərini bildirib.

Telegramda izləyin