Toy salonunun anbarında meyit tapılıb

Türkiyənin Manisa vilayətinin Kırkağaç rayonunda yerləşən şadlıq sarayının anbar hissəsində bir nəfərin meyiti aşkarlanıb.

Sonxeber.az türk mediasına istinadən xəbər verir ki, hadisə Küçük Çam Şəhidlər Parkı ərazisində fəaliyyət göstərən şadlıq sarayında baş verib.

Məlumata görə, anbar hissəsinə daxil olan işçilərdən biri yerdə hərəkətsiz uzanan şəxsi görərək dərhal aidiyyəti qurumlara məlumat verib. Hadisə yerinə gələn təcili tibbi yardım və polis əməkdaşları şəxsin həyatını itirdiyini müəyyən ediblər. Onun 47 yaşlı Hasan Yağcı olduğu bildirilib.

İlkin ehtimallara görə, hadisənin intihar olması versiyası araşdırılır. Ölümün dəqiq səbəbinin müəyyənləşdirilməsi məqsədilə meyit üzərində məhkəmə-tibbi ekspertiza təyin olunub.

Prokurorun hadisə yerində apardığı araşdırmalardan sonra Hasan Yağcının nəşi yarılma üçün Kırkağaç Dövlət Xəstəxanasının morquna aparılıb. Faktla bağlı cinayət işi başlanıb, istintaq hərtərəfli davam etdirilir.

Telegramda izləyin