Qanunsuz elektrik xəttini gizlətmək üçün görün nə etdilər - VİDEO

Türkiyənin Diyarbakır vilayətində qanunsuz elektrik istifadəsinə qarşı aparılan yoxlama zamanı diqqətçəkən hadisə baş verib.

Sonxeber.az türk mediasına istinadən xəbər verir ki, nəzarət zamanı qaçaq elektrik xətlərini görən bir nəfər elektrik dirəyinə çıxaraq bağlantıları söküb.

Hadisə Hazro rayonunun Sarıerik məhəlləsində qeydə alınıb. Bölgədə elektrik paylanmasını həyata keçirən Dicle Elektrik şirkətinin əməkdaşları dron vasitəsilə apardıqları yoxlama zamanı bir yaşayış evinə və ona bitişik tikiliyə dirək üzərindən qanunsuz elektrik xətti çəkildiyini müəyyən ediblər.

Dron vasitəsilə aparılan müşahidə zamanı qaçaq istifadənin aşkarlandığını anlayan bir şəxsin tələsik elektrik dirəyinə qalxdığı və qanunsuz xətləri bağlantı nöqtələrindən ayırdığı görüntülərdə əks olunub. Həmin anlar dron kamerası ilə saniyə-saniyə qeydə alınıb.

Aparılan texniki araşdırmalar nəticəsində müəyyən edilib ki, qanunsuz elektrikdən həm yaşayış evinin ehtiyaclarının ödənilməsi, həm də ərazidəki su quyusundan suyun çəkilməsi üçün istifadə olunub. M.Ş.T. adlı abonent barəsində inzibati tədbir görülüb, faktla bağlı materiallar hüquq-mühafizə orqanlarına təqdim edilib.

Dicle Elektrik rəsmiləri elektrik dirəklərinə müdaxilənin həyati təhlükə yaratdığını vurğulayaraq, bu cür qanunsuz qoşulmaların həm enerji infrastrukturuna, həm də insanların can və əmlak təhlükəsizliyinə ciddi risk yaratdığını bildiriblər.

Telegramda izləyin