"Belçika və Niderland parlamentlərinin qəbul etdiyi sənədlərə qarşı Azərbaycanın etirazı diplomatik müstəvidə mühüm siqnaldır" - ŞƏRH

Belçikanın və Niderlandın Azərbaycandakı səfirləri Julyen de Frepon və Marian de Yonq ayrı-ayrılıqda Xarici İşlər Nazirliyinə (XİN) çağırılıblar.

Bu barədə Azərbaycan XİN məlumat verib.

Qeyd olunub ki, görüşlər zamanı 16 aprel 2026-cı il tarixində Belçika və Niderland Parlamentləri tərəfindən qəbul edilmiş, Azərbaycanın suverenliyini və ərazi bütövlüyünü, eləcə də Azərbaycanla Ermənistan arasında davam edən sülh prosesini sarsıtmaq məqsədi daşıyan növbəti məsuliyyətsiz cəhdlər olan sənədlərə qarşı kəskin etiraz bildirilib.

Sənədlərin tamamilə yalan və əsassız qiymətləndirmələrə uyğun olaraq tərtib edildiyi, bu qurumlar daxilində dərin kök salmış Azərbaycan əleyhinə qərəzi nümayiş etdirdiyi vurğulanıb.

"Belçika və Niderland parlamentlərinin 16 aprel 2026-cı ildə qəbul etdiyi sənədlərə qarşı Azərbaycanın sərt etirazı diplomatik müstəvidə mühüm siqnaldır" , - bunu Sonxeber.az -a açıqlama verən politoloq Tural İsmayılov deyib:

"Bu addım, Azərbaycanın suverenliyi və ərazi bütövlüyü ilə bağlı prinsipial mövqeyinin dəyişməz olduğunu bir daha nümayiş etdirir. Parlamentlərin qəbul etdiyi sənədlərin əsassız və qərəzli olması, həm beynəlxalq hüququn fundamental prinsiplərinə, həm də regionda davam edən sülh prosesinə ziddir. Bu cür qərarlar, əslində, Ermənistanla aparılan danışıqların konstruktiv ruhunu zədələyir və regionda sabitlik üçün zəruri olan etimad mühitinə mənfi təsir göstərir.

Azərbaycanın XİN tərəfindən səfirlərə bildirilməsi, diplomatik münasibətlərdə balansı qorumaq və ikitərəfli əlaqələrin zədələnməsinin qarşısını almaq məqsədi daşıyır. Burada diqqətçəkən məqam odur ki, sənədlərin qəbulunun Azərbaycan və Ermənistan parlament spikerlərinin görüşü ilə eyni vaxta təsadüf etməsi paradoksal bir vəziyyət yaradır. Bu, Avropa parlamentlərindəki anti-Azərbaycan qruplarının məqsədli fəaliyyətini və onların regiondakı real sülh təşəbbüslərinə qarşı sabotaj xarakterli addımlarını göstərir.

Belçika və Niderland diplomatik nümayəndələrinin çağırılması həm də xəbərdarlıq xarakteri daşıyır: Azərbaycan tərəfi açıq şəkildə bildirir ki, əsassız iddialar və saxta istinadlar ikitərəfli münasibətlərin gələcəyinə zərər verə bilər. Bu, Avropa dövlətlərinin daxili siyasi qruplarının məsuliyyətsiz addımlarının qarşısını almaq üçün hökumətlərin daha ciddi mövqe sərgiləməsini tələb edir.

Nəticə etibarilə, Azərbaycanın reaksiyası həm milli maraqların müdafiəsi, həm də beynəlxalq hüququn aliliyinin qorunması baxımından tamamilə haqlıdır. Bu hadisə göstərir ki, regionda sülhün bərqərar olması üçün yalnız tərəflərin birbaşa dialoqu və qarşılıqlı hörmət prinsipləri əsas ola bilər, üçüncü tərəflərin qərəzli müdaxilələri isə prosesi yalnız çətinləşdirir".

Telegramda izləyin