Azərbaycan və digər türk dövlətləri təhlükəsizlik məsələlərində ortaq hərəkət etməlidirlər - ŞƏRH

"Türk Dövlətləri Təşkilatının təhlükəsizlik məsələləri ən ciddi məsələlər sırasındadır. Türk dövlətləri olaraq ortaq təşkilatda birləşiriksə və daha irəli getmək istəyiriksə, təhlükəsizlik məsələlərinə də ciddi diqqət yetirməliyik. Ən əsası isə bu sahədə ortaq hərəkət etməliyik. Çünki ayrı-ayrı dövlətlər olaraq təhlükəsizliklə bağlı məsələlərin öhdəsindən gəlməkdə çətinlik çəkə bilərik".
Bunu Sonxeber.az-a açıqlamasında siyasi şərhçi Azər Həsrət deyib.

O, bildirib ki, qloballaşan dünyada ayrı-ayrı dövlətlərin öz maraq və mənafelərini qoruması, ümumiyyətlə, təhlükəsizlik məsələlərini təkbaşına həll etməsi getdikcə çətinləşir:

"Hətta dünyanın ən böyük dövlətləri belə təhlükəsizlik məsələlərində kiçik dövlətlərlə əməkdaşlığa ehtiyac duyurlar. Bu baxımdan, Türk Dövlətləri Təşkilatına üzv ölkələr də bir-biri ilə əl-ələ verərək təhlükəsizlik məsələlərində ortaq mövqe və fəaliyyət ortaya qoymalıdırlar. Prezident İlham Əliyevin bu məsələyə diqqət çəkməsi də təsadüfi deyil. O, strateji və uzaqgörən yanaşma ilə bu məsələlərin üzərində dayanır. Bu gün vəziyyət bizə rahat və sakit görünə bilər, amma gələcəkdə bunun belə davam edəcəyinə heç bir təminat yoxdur. Gələcəkdə arzuolunmaz vəziyyətlərlə üzləşməmək üçün Azərbaycan da, digər türk dövlətləri də təhlükəsizlik məsələlərində ortaq hərəkət etməlidirlər".

Röyalə Xəyal

Telegramda izləyin