15 yaşlı qız uşaq dünyaya gətirdi: Günah kimdədir? - AÇIQLAMA

Ucarda yeniyetmə uşaq dünyaya gətirib.

Sonxeber.az rayon sakini 15 yaşlı yeniyetmə Ucar Rayon Mərkəzi Xəstəxanasının Doğum şöbəsinə yerləşdirilib.

Xəstəxanadan verilən xəbərə görə, aprelin 14-də saat 19 radələrində 2011-ci il təvəllüdlü hamilə doğuş sancıları ilə Ucar Rayon Mərkəzi Xəstəxanasının Doğum şöbəsinə hospitalizasiya olunub.

Ona 31-32 həftəlik hamiləlik diaqnozu təyin edilib. Pasiyent saat 20:20-də cinsi kişi, çəkisi 1900 qram, boyu 44 sm uşaq dünyaya gətirib.

Hadisə ilə əlaqədar hüquq-mühafizə orqanlarına məlumat verilib.

Bəs görəsən tətbiq edilən cəzalar niyə bu kimi hadisələrin qarşısını almır?

Sosioloq Mətanət Məmmədova bu barədə Sonxeber.az -a açıqlama verib:

"Bu cür əməllərə görə Azərbaycan Respublikasının Cinayət Məcəlləsi çərçivəsində konkret və kifayət qədər sərt cəzalar nəzərdə tutulur. Hətta son illər bu cəzaların daha da sərtləşdirildiyini görürük. Buna baxmayaraq, bəzi hallarda insanların qanunun tələblərinə əməl etməməsi ciddi suallar doğurur.

Ucar rayonunda 15 yaşlı qızın uşaq dünyaya gətirməsi ilə bağlı hadisənin detalları hələlik tam açıqlanmayıb. Hadisənin təcavüz, nikahdankənar münasibət, yaxud erkən nikah zəminində baş verib-vermədiyi istintaqın nəticəsində bəlli olacaq. Lakin səbəbindən asılı olmayaraq, yetkinlik yaşına çatmamış bir qızın ana olması hüquqi baxımdan cinayət məsuliyyəti yaradan haldır.

Hazırda istintaq qrupu məsələ ilə bağlı araşdırmalara başlayıb. Hadisənin kim tərəfindən, hansı şəraitdə və necə baş verdiyi dəqiqləşdirildikdən sonra günahkar şəxslər qanun qarşısında cavab verəcəklər.

Əslində, qanunvericilikdə nəzərdə tutulan cəzalar kifayət qədər təsirli mexanizmdir. Problem daha çox insanların məsuliyyətsiz yanaşmasında və hüquqi normalara laqeyd münasibətindədir. Unutmaq olmaz ki, yetkinlik yaşına çatmayan şəxsin razılığı hüquqi qüvvəyə malik deyil və belə hallarda söhbət yalnız zorakılıqdan gedə bilər. Digər ehtimallar sırasında qeyri-rəsmi münasibətlər və ya ailə tərəfindən erkən nikaha məcbur etmə halları da yer ala bilər.

Hər bir halda, bu hadisə hüquqi müstəvidə cinayət kimi qiymətləndirilməlidir. İstintaq yekunlaşdıqdan sonra isə bu işdə məsuliyyəti olan hər kəsin layiqli cəzasını alacağı gözlənilir"

Telegramda izləyin