"Həddindən artıq ucuzdursa, səbəbi var" - Ekspert saxta məhsullarla bağlı xəbərdarlıq etdi

Son illər bazarda "original", "A class" və saxta məhsulların sayı artdıqca, xüsusilə geyim alarkən istehlakçıların seçim etməsi daha da çətinləşib. Bəzən xarici görünüşcə bir-birinə çox bənzəyən məhsullar arasında fərqi müəyyənləşdirmək asan olmur. Bu isə alıcıların həm maddi itki ilə üzləşməsinə, həm də yanlış seçim etməsinə səbəb ola bilir.

Bəs original və ya "A class" geyim seçərkən saxta məhsul olub-olmadığını necə ayırd etmək olar? İstehlakçılar alış zamanı hansı detallara diqqət etməlidir?

Məsələ ilə bağlı Sonxeber.az-a Strateji Kommunikasiya üzrə ekspert Səfər Aslanov danışıb.

O, açıqlamasında qeyd edib ki, müasir bazarda istehlakçıların üzləşdiyi ən ciddi problemlərdən biri original, "A class" və saxta məhsullar arasındakı fərqi müəyyənləşdirməkdir:

"Xarici görünüşcə demək olar ki, eyni olan bu məhsullar arasında seçim etmək, xüsusilə geyim sahəsində getdikcə çətinləşir. Bir biznes konsultant kimi bu məsələyə sistemli yanaşmaq daha məntiqli olar.

Ən etibarlı ilk siqnal həmişə qiymətdir. Hər bir brendin bazar qiyməti rəsmi saytlar və avtorizasiya olunmuş satıcılar vasitəsilə əvvəlcədən araşdırıla bilər. Əgər təklif olunan qiymət orijinalın 30-50%-nə düşürsə, bu artıq ciddi şübhə yaradır. Sadə bir qayda olaraq: əgər bir şey həddindən artıq ucuzdursa, mütləq bir səbəbi var.

Qiymətdən sonra fiziki keyfiyyət göstəriciləri diqqətlə nəzərdən keçirilməlidir: tikişlərdə xətlərin bərabərliyi, iplik uclarının səliqəli kəsilməsi və tikiş sıxlığı. Orijinal brendlərdə adətən 1 sm-də 8-12 tikiş norması tətbiq olunur. Bu, keyfiyyətin əsas göstəricilərindəndir. Materiala toxunarkən orijinal parçanın yumşaq, lakin möhkəm hiss olunması gözlənilir. Ucuz saxtalarda isə sintetik qoxu, sərtlik və qeyri-təbii ağırlıq hiss olunur. Düymələr, fermuar və toqqalar kimi metal furnitura elementləri də diqqətdən qaçmamalıdır.

Loqo və brend detalları da mühüm yoxlama nöqtəsidir. Loqonun simmetriyası, şrifti və rəngi brendin rəsmi saytındakı ilə tam üst-üstə düşməlidir. Etiketdəki bulanıq çap, solğun rənglər və ya orfoqrafik səhvlər saxtalığın açıq əlamətlərindəndir. Bir çox premium brend bunun üzərinə gizli loqo, su nişanı və ya mikro çap kimi əlavə qoruma mexanizmləri də tətbiq edir.

Rəqəmsal yoxlama imkanlarından da mütləq istifadə edilməlidir. QR kod və ya serial nömrəsi brendin rəsmi saytında yoxlanıla bilər. Dior, Louis Vuitton, Moncler kimi premium brendlər artıq məhsullarına NFC çip yerləşdirir. Bundan əlavə, Entrupy, Legit App və CheckFresh kimi tətbiqlər istehlakçılara saxtalığı müstəqil şəkildə aşkar etməyə imkan verir".

Ekspert onu da vurğuladı ki, satıcının etibarlılığı isə bütün bu meyarları tamamlayan son, lakin bir o qədər vacib amildir:

"Orijinal satıcı faktura, zəmanət kartı, brend qutusu və rəsmi geri qaytarma siyasəti təqdim edir. Buna qarşılıq, yalnız sosial media üzərindən fəaliyyət göstərən, sənədsiz satış edən və geri qaytarma qəbul etməyən satıcılar ciddi şübhə yaradır.

"A class" məhsul anlayışına gəldikdə isə bir vacib qeydi xüsusi vurğulamaq lazımdır. İstehlakçılar bu kateqoriyanı çox zaman "yüksək keyfiyyətli surət" mənasında qəbul etsə də, biznes və hüquqi baxımdan bu məhsullar brendin icazəsi olmadan istehsal olunduğundan intellektual mülkiyyət hüququnun pozulması sayılır. Bundan başqa, "A class" kateqoriyası heç bir standartla tənzimlənmir. İstənilən satıcı istədiyi məhsula bu adı verə bilər. Alıcı üçün risk isə saxta məhsulda olduğu kimidir: nə zəmanət var, nə də sabit keyfiyyət.

Yekun tövsiyə olaraq deyə bilərəm ki, orijinal məhsul almaq istəyən istehlakçı mütləq avtorizasiya olunmuş satıcılara və ya brendin rəsmi platformasına müraciət etməlidir. Büdcə məhdudiyyəti varsa, saxta "lüks"ə pul xərcləmək əvəzinə Zara, Mango və ya H&M kimi keyfiyyəti sübut olunmuş əlçatan brendlərə üstünlük vermək daha ağıllı istehlakçı davranışıdır".

Vüsalə İbrahimli

Telegramda izləyin