Balkonda silahları "paltar kimi" sərgiləyən şəxs saxlanıldı

Hatayda baş verən qeyri-adi hadisə həm sakinlərin, həm də hüquq-mühafizə orqanlarının diqqətini cəlb edib.

Sonxeber.az türk mediasına istinadən xəbər verir ki, Türkiyənin Hatay vilayətində bir şəxs evinin balkonunda tüfəng, tapança və digər kəsici alətləri paltar kimi sərgiləyərək təəccüb doğurub.

Hadisə İskenderun rayonunun Yunus Emre məhəlləsində yerləşən fərdi yaşayış evlərindən birində qeydə alınıb. Məlumata görə, balkon hissəsində açıq şəkildə silah və müxtəlif təhlükəli əşyaların asıldığı barədə polisə məlumat daxil olub.

Hatay İl Emniyyət Müdirliyinin əməkdaşları aprelin 17-də həmin ünvana gələrək araşdırmalara başlayıblar. Baxış zamanı balkonda 1 ədəd tüfəng, 2 ədəd tapança, balta və qılıncın asılı vəziyyətdə olduğu aşkarlanıb.

Hərəkəti ilə təəccüb doğuran şübhəli şəxs - B.A. polis tərəfindən saxlanılıb və onun barəsində müvafiq hüquqi tədbirlər görülüb.

Faktla bağlı araşdırma davam etdirilir.

Telegramda izləyin