"Meta" işçilərinin fəaliyyətini izləyəcək

ABŞ-nin "Meta" şirkəti əməkdaşlarının xidməti kompüterlərində yeni nəzarət alətləri quraşdırmağı planlaşdırır. Bu sistem vasitəsilə klaviatura toxunuşları və kliklər qeydə alınacaq, həmçinin müntəzəm olaraq ekranın skrinşotları (ekran görüntüləri) çəkiləcək.

Oxu.Az "Reuters" agentliyinə istinadən xəbər verir ki, bu yenilik barədə korporasiyanın daxili sənədlərində məlumat yer alıb.

İşçilər daxili sistemlərdən istifadə etdikləri zaman "Model Qabiliyyəti Təşəbbüsü" adlanan proqram işə düşəcək və toplanan informasiya süni intellektin inkişaf etdirilməsi üçün istifadə olunacaq. Proqramın əsas hədəfi insanların interfeyslərlə (qısayollar, menyular və digər idarəetmə alətləri ilə) necə işlədiyini göstərən real məlumat bazası formalaşdırmaqdır.

Korporasiya bəyan edir ki, bu məlumatlar personalın iş səmərəliliyini yoxlamaq məqsədi daşımır və sırf elmi-tədqiqat işlərinə yönəldiləcək. Eyni zamanda, "Meta" rəsmisi fərdi və həssas məlumatların təhlükəsizliyini təmin etmək üçün xüsusi addımların atıldığını vurğulayıb.

Telegramda izləyin