İnanmasanız da, özünüzü ağıllı hesab etməlisiniz - SƏBƏBİ

Mütəxəssislər bildirir ki, insanın özünü necə qiymətləndirməsi onun həyatına birbaşa təsir edir. Özünü kifayət qədər ağıllı hesab etməyən insanlar çox vaxt imkanlardan qaçır, halbuki psixologiya sübut edir ki, öz zəkanına inam inkişaf üçün vacib resursdur.

Lent.az xarici mediaya istinadən xəbər verir ki, psixoloqların fikrincə, "mən bacarmaram" düşüncəsi insanın davranışına təsir edir.

Bu cür yanaşma çətin tapşırıqlardan uzaq durmağa, risk etməməyə və məsuliyyətdən qaçmağa səbəb olur. Əksinə, "mən öyrənə bilərəm" düşüncəsi insanı hərəkətə keçirir və nəticədə inkişaf baş verir.

Araşdırmalar göstərir ki, zəka sabit anlayış deyil. O, təcrübə, öyrənmə və praktika ilə inkişaf edir. Bu səbəbdən bu gün çətin görünən mövzu zamanla daha aydın və başa düşülən ola bilər.

Özünə inam qərarvermə prosesinə də təsir edir. Öz qabiliyyətinə şübhə edən insanlar uzun müddət tərəddüd edir və səhv etməkdən qorxur. Halbuki özünə güvənən insan daha tez qərar verir və nəticələrdən dərs çıxararaq təcrübə toplayır.

Psixoloqlar vurğulayır ki, səhvlər zəiflik deyil, inkişafın bir hissəsidir. Ağıllı insanlar səhv etməyənlər deyil, səhvlərdən nəticə çıxaranlardır. "Səhv etsəm, pis görünərəm" qorxusu isə inkişafı ləngidən əsas amillərdən biridir.

Mütəxəssislər düşüncə tərzini dəyişmək üçün daxili dialoqa diqqət yetirməyi tövsiyə edir. "Mən başa düşmürəm" demək əvəzinə "mən hələ başa düşmürəm" kimi ifadələr istifadə etmək daha faydalıdır.

Telegramda izləyin