"Azərbaycan ilə İtaliya arasında münasibətlər nümunəvi tərəfdaşlıq modeli kimi diqqət çəkir" - DEPUTAT

"Beynəlxalq münasibətlər sistemində regional və qlobal əməkdaşlıqların güclənməsi dövlətlərin strateji seçimlərindən birbaşa asılıdır" , - bunu Sonxeber.az -a açıqlama verən deputat Şahiun Seyidzadə deyib:

"Bu kontekstdə Azərbaycan ilə İtaliya arasında münasibətlər nümunəvi tərəfdaşlıq modeli kimi diqqət çəkir. Prezident İlham Əliyevin İtaliya Baş naziri Ciorcia Meloninin səfəri zamanı verdiyi bəyanat bu əməkdaşlığın həm geosiyasi, həm də iqtisadi aspektlərini geniş şəkildə əks etdirir. Azərbaycan və İtaliya arasında qurulan münasibətlər Avropa ilə Cənubi Qafqaz regionu arasında körpü rolunu oynayır. İtaliya Avropa İttifaqının aparıcı dövlətlərindən biri kimi Azərbaycanın Avropa ilə əlaqələrinin inkişafında mühüm rol oynayır. Bu baxımdan iki ölkə arasında strateji tərəfdaşlıq yalnız ikitərəfli deyil, həm də çoxtərəfli əməkdaşlıq platforması kimi çıxış edir.
Enerji faktoru bu münasibətlərin mərkəzində dayanır. Azərbaycanın zəngin enerji resursları və coğrafi mövqeyi onu Avropanın enerji təhlükəsizliyi üçün vacib tərəfdaşa çevirir. Cənub Qaz Dəhlizi vasitəsilə həyata keçirilən qaz ixracı Avropanın enerji diversifikasiyasına mühüm töhfə verir. Xüsusilə TAP layihəsi bu əməkdaşlığın əsas sütunlarından biridir. Bu layihənin genişləndirilməsi istiqamətində aparılan müzakirələr Azərbaycanın enerji ixrac imkanlarının daha da artırılmasına yönəlib.
İqtisadi münasibətlər də dinamik inkişaf edir. Azərbaycan Dövlət Neft Fondu tərəfindən İtaliya iqtisadiyyatına qoyulan milyardlarla dollar sərmayə qarşılıqlı etimadın göstəricisidir. Eyni zamanda, İtaliya şirkətlərinin Azərbaycanda geniş fəaliyyəti bu əməkdaşlığın qarşılıqlı fayda prinsipinə əsaslandığını göstərir. Postmünaqişə dövründə Azərbaycanın bərpa strategiyasında İtaliya şirkətlərinin fəal iştirakı xüsusi qeyd olunmalıdır. Qarabağ və Şərqi Zəngəzurda həyata keçirilən layihələr yalnız iqtisadi deyil, həm də siyasi və humanitar əhəmiyyət daşıyır. Hərbi-texniki əməkdaşlıq isə münasibətlərin strateji dərinliyini artıran mühüm amildir. Müdafiə sənayesi sahəsində əməkdaşlıq, texnologiya mübadiləsi və birgə istehsal imkanları iki ölkə arasında yeni əməkdaşlıq modelinin formalaşdığını göstərir.
Humanitar sahədə əməkdaşlıq da diqqət mərkəzindədir. İtaliya-Azərbaycan Universiteti iki ölkə arasında elmi və təhsil əlaqələrinin inkişafında mühüm rol oynayır. Bu universitet gələcəkdə yeni nəslin formalaşmasına və iki xalq arasında əlaqələrin möhkəmlənməsinə xidmət edəcək.
Prezident İlham Əliyevin bəyanatında vurğulanan əsas məqamlardan biri də gələcəyə yönəlmiş əməkdaşlıq perspektivləridir. Enerji, iqtisadiyyat, müdafiə və təhsil sahələrində əməkdaşlığın genişləndirilməsi planları bu münasibətlərin davamlı inkişafını təmin edəcək. Nəticə etibarilə, İlham Əliyevin çıxışı göstərir ki, Azərbaycan-İtaliya münasibətləri yalnız mövcud nailiyyətlərlə məhdudlaşmır, eyni zamanda gələcəyə hesablanmış strateji baxış üzərində qurulub. Ciorcia Meloninin səfəri isə bu strateji tərəfdaşlığın daha da möhkəmlənməsinə və yeni istiqamətlər üzrə inkişafına güclü təkan verir".

Telegramda izləyin