Balıq ovlamaq üçün dənizə girən gənc oğlan həyatını itirib - VİDEO

Türkiyənin Bartın vilayətinin Amasra rayonunda balıq ovlamaq üçün dənizə girən 30 yaşlı Mustafa Onur Özgenç boğulma təhlükəsi keçirərək xəstəxanaya çatdırılıb. Həkimlərin bütün müdaxilələrinə baxmayaraq onun həyatını xilas etmək mümkün olmayıb.

Sonxeber.az xarici mediaya istinadən xəbər verir ki, hadisə ötən axşam saatlarında Türkiyə Daş Kömürləri Qurumunun (TTK) yaşayış binalarının yaxınlığındakı sahildə baş verib. Xüsusi dalğıc geyimi ilə balıq ovuna çıxan Mustafa Onur Özgenç uzun müddət sudan çıxmayıb.

Ərazidə tilovla balıq tutan şəxslər vəziyyəti fərq edərək təcili tibbi yardım xidmətinə məlumat veriblər. Hadisə yerinə cəlb olunan Sahil Mühafizəsinin Qərbi Qaradəniz Qrup Komandanlığının DEGAK-3 dalğıc qrupu Özgençi son göründüyü nöqtədən təxminən 10 metr aralıda, 15 metr dərinlikdə huşsuz vəziyyətdə tapıb.

Mustafa Onur Özgenç əvvəlcə Amasra Dövlət Xəstəxanasına aparılıb, ilkin tibbi yardımdan sonra isə Bartın Dövlət Xəstəxanasına köçürülüb. Reanimasiyada müalicə alan gənc bu gün səhər saatlarında vəfat edib.

Məlumata görə, Mustafa Onur Özgenç Bartında futbol hakimi kimi də fəaliyyət göstərib. Onun nəşi ekspertizadan sonra doğulduğu Mersinin Erdemli rayonuna göndəriləcək.

Telegramda izləyin