Ebola təhlükəsi böyüyür: Avropa və Cənubi Amerikada fövqəladə tədbirlər görülür

Demokratik Kongo Respublikasında Ebola virusundan ölənlərin sayı 42-yə çatıb. Virus şübhəsinin İtaliya və Braziliyaya qədər yayılması səhiyyə qurumlarını hərəkətə keçirib.

Sonxeber.az xarici mediaya istinadən xəbər verir ki, Demokratik Kongo Respublikasında Bundibugyo ştammı ilə əlaqəli Ebola virusu epidemiyası narahatlıq doğurmaqda davam edir. Son məlumatlara görə, virus səbəbindən həyatını itirənlərin sayı 42 nəfərə yüksəlib.

Beynəlxalq uçuşlar vasitəsilə virusun digər ölkələrə yayılma riski artdığından, bir sıra dövlətlər təhlükəsizlik tədbirlərini gücləndirib. Ümumdünya Səhiyyə Təşkilatı (ÜST) erkən diaqnoz və vaxtında müalicə nəticəsində sağalma hallarının qeydə alındığını bildirsə də, vəziyyət diqqətlə izlənilir.

Ebola virusuna yoluxma şübhəsinin qeydə alındığı İtaliya və Braziliyada səhiyyə qurumları yüksək hazırlıq rejiminə keçib. Hər iki ölkədə hava limanlarında və tibb müəssisələrində nəzarət tədbirləri sərtləşdirilib, xüsusi tibbi protokollar tətbiq olunmağa başlanıb.

Mütəxəssislər bildirirlər ki, virusun daha geniş coğrafiyaya yayılmasının qarşısını almaq üçün beynəlxalq əməkdaşlıq, sərhəd nəzarəti və operativ tibbi müdaxilə xüsusi əhəmiyyət daşıyır.

Telegramda izləyin