Kim Çen In Putinə dəstək mesajı göndərdi: Strateji tərəfdaşlıq möhkəmlənəcək

Şimali Koreya lideri Kim Çen In Rusiyanın Milli Günü münasibətilə Rusiya Prezidenti Vladimir Putinə təbrik məktubu göndərib.

Sonxeber.az xarici mediaya istinadən xəbər verir ki, Şimali Koreya dövlət mediasının yaydığı məlumata görə, Kim məktubunda Moskva rəhbərliyinə tam dəstəyini ifadə edib. O, Pxenyanın Rusiyanın daxili və xarici siyasət kursunu dəstəkləməyə davam edəcəyini vurğulayıb.

Kim Çen In iki ölkə arasında son illərdə inkişaf edən strateji tərəfdaşlıq münasibətlərinə diqqət çəkərək, Şimali Koreya ilə Rusiya arasındakı əməkdaşlığın gələcəkdə daha da güclənəcəyinə əmin olduğunu bildirib.

Şimali Koreya lideri həmçinin iki ölkə arasında dostluq və əməkdaşlıq əlaqələrinin qarşılıqlı maraqlar əsasında genişləndirilməsinin vacibliyini qeyd edib.

Qeyd edək ki, son dövrlərdə Moskva ilə Pxenyan arasında siyasi, hərbi və iqtisadi sahələrdə əməkdaşlıq əhəmiyyətli dərəcədə genişlənib.

Telegramda izləyin