ABŞ Avropada hərbi qüvvələrini azaldır: Siyahıda nə var?

ABŞ Avropadakı NATO əməliyyatları üçün əlçatan olan "F-15E" və "F-16" qırıcılarının sayını təqribən 150-dən 100-ə qədər azaltmağı planlaşdırır.

Oxu.Az xəbər verir ki, bu barədə "The New York Times" məlumat yayıb.

Məlumatda bildirilib ki, Ağ Ev NATO əməliyyatları üçün ayırdığı hərbi qüvvə və vasitələrin həcmini əhəmiyyətli dərəcədə azaltmağı planlaşdırır.

Plana əsasən, Vaşinqton aşağıdakıları nəzərdə tutur:

- dəniz kəşfiyyat təyyarələrinin miqdarını 26-dan 15-ə endirmək;

- əvvəllər Avropa istiqamətinə təhkim olunmuş bütün səkkiz yanacaqdolduran təyyarəni geri çəkmək;

- təyyarədaşıyan gəmini, raket silahları ilə təchiz edilmiş atom sualtı qayığını, eləcə də onları müşayiət edən gəmiləri və aviasiyanı başqa yerə köçürmək;

- Avropanın müdafiəsi üçün nəzərdə tutulmuş iki strateji bombardmançı qrupundan birini yenidən bölüşdürmək.

Nəşrin məlumatına görə, ixtisarlar artıq yaxın vaxtlarda qüvvəyə minə bilər və alyansın kəşfiyyat, Rusiya sualtı qayıqlarını izləmə və uzaq məsafəli zərbələr endirmə imkanlarına təsir göstərəcək. Pentaqon konkret rəqəmləri şərh etməyib, lakin ABŞ Silahlı Qüvvələrinin Avropa Komandanlığının Amerikanın Avropadakı öhdəliklərinin həcminə yenidən baxmaq niyyəti barədə bu yaxınlarda verdiyi bəyanata istinad edib. NYT bu qərarı ABŞ Prezidenti Donald Tramp Administrasiyasının Amerikanın Avropadakı hərbi iştirakını azaltmaq və resursların bir hissəsini Hind-Sakit okean regionuna keçirmək siyasəti ilə əlaqələndirir. Bununla yanaşı, materialda qeyd olunur ki, Birləşmiş Ştatlar Avropa qitəsində NATO-nun ən böyük hərbi qüvvələrindən birini qoruyub saxlayacaq.

Telegramda izləyin