Kirayə qiymətlərindən bezən həkim çadırda yaşamağa başladı - VİDEO

Bodrumda sürətlə artan kirayə qiymətləri bu dəfə gənc bir həkimin qərarı ilə gündəmə gəlib.

Sonxeber.az xarici mediaya istinadla xəbər verir ki, rayonda çalışan həkim yay mövsümü üçün ev kirayələmək istəyərkən ondan beş aylıq müddətə 500 min lirə tələb olunduğunu bildirib. Bu məbləği ödəməkdən imtina edən həkim fərqli çıxış yolu tapıb.

Gənc qadın təxminən 20 min lirəyə çadır alaraq elektrik və su təminatı olan düşərgə ərazisində məskunlaşıb. O, düşərgə üçün aylıq 18 min lirə ödədiyini və yay aylarını burada keçirəcəyini deyib.

Sosial şəbəkədə paylaşdığı görüntülər qısa müddətdə geniş maraq doğurub. İzləyicilər xüsusilə Türkiyədə mənzil və kirayə böhranının çatdığı həddə diqqət çəkiblər. Bir çox istifadəçi vaxtilə həkimlərin bir maaşla ev ala bildiyini, indi isə kirayə mənzil tutmaqda çətinlik çəkdiklərini vurğulayıb.

Gənc həkim gələcəkdə də yüksək kirayə xərclərindən uzaq, daha sərbəst həyat tərzi sürmək istədiyini bildirib. O, qış aylarında isə yaşayış xərclərinin daha aşağı olduğu ölkələrdən birində qalmağı planlaşdırdığını qeyd edib.

Telegramda izləyin