Nəhəng çəyirtkəyə ət yedirdi - VİDEO

Türkiyənin Elazığ vilayətinin Baskil rayonunda bir sakin yolda rast gəldiyi nəhəng çəyirtkəni evinə apararaq ona ət verib. Çəyirtkənin əti iştahla yediyi anlar mobil telefon kamerası ilə lentə alınıb.

Sonxeber.az xarici mediaya istinadla xəbər verir ki, Pınarlı kəndində qeydə alınan hadisədə sakin, bölgədə "ətyeyən çəyirtkə" kimi tanınan nəhəng həşəratın qidalanma tərzini yoxlamaq üçün qarşısına bir parça ət qoyub. Görüntülərdə çəyirtkənin verilən əti qısa müddətdə yediyi görünür.

Mütəxəssislərin sözlərinə görə, Saga cinsinə aid olan bu ətyeyən çəyirtkələr zahirən qorxuducu görünsələr də, insanlar və əkin sahələri üçün təhlükə yaratmırlar. Əksinə, əkinlərə zərər verən digər həşəratlarla qidalandıqları üçün kənd təsərrüfatı baxımından faydalı hesab olunurlar.

Çəyirtkəni bir müddət müşahidə etdikdən sonra sakin onu yenidən təbii yaşayış mühitinə buraxıb. Hadisənin görüntüləri sosial şəbəkələrdə maraqla qarşılanıb.

Telegramda izləyin