"Apple" 2027-ci ildə ən azı beş yeni "iPhone" modeli təqdim edə bilər

ABŞ-ın texnologiya nəhəngi "Apple"- ın 2027-ci il üçün genişmiqyaslı məhsul təqdimatına hazırlaşdığı iddia olunur.

Sonxeber.az xarici mediaya istinadən xəbər verir ki, Nikkei Asia nəşrinin yaydığı məlumata görə, şirkət 2026-cı ilin ikinci yarısından 2027-ci ilin ilk yarısınadək məhsul çeşidini əhəmiyyətli dərəcədə genişləndirməyi planlaşdırır.

İddialara əsasən, "Apple" həmin dövrdə istifadəçilərə ən azı beş yeni "iPhone" modelini təqdim etməyi hədəfləyir. Bununla yanaşı, şirkətin gözləniləndən daha çox sayda qatlana bilən "iPhone" modelini də bazara çıxarmağa hazırlaşdığı bildirilir.

Məlumatda qeyd olunur ki, "Apple" bu strategiya ilə qlobal komponent tədarükündə yaşanan çətinliklərə baxmayaraq, smartfon bazarındakı payını artırmağı qarşısına məqsəd qoyub.

Sənaye mənbələrinin fikrincə, şirkət çiplər və digər mühüm komponentlərin tədarükü məsələsində rəqibləri ilə müqayisədə daha güclü mövqeyə malikdir. Bu üstünlüyün "Apple"-a yeni məhsullarını planlaşdırdığı qrafikə uyğun şəkildə bazara çıxarmağa imkan verəcəyi ehtimal olunur. Bununla belə, şirkət sözügedən məlumatlarla bağlı hələlik rəsmi açıqlama verməyib.

Telegramda izləyin