Yayda bunu heç vaxt etməyin - istidə ətrin əsas təhlükəsi

Yay mövsümündə istifadə etdiyimiz sevimli ətirlər təkcə xoş qoxu mənbəyi deyil, eyni zamanda düzgün tətbiq edilmədikdə dəri üçün ciddi problem yarada bilər. Mütəxəssislər bildirirlər ki, isti havalarda ətirdən yanlış istifadə həm piqment ləkələrinin yaranmasına, həm də ətrafdakı insanlar üçün narahatlıq yaradan ağır qoxuya səbəb ola bilər.

Lent.az xarici mediaya istinadən xəbər verir ki, mütəxəssislərin fikrincə, ən böyük səhv ətiri birbaşa günəşə məruz qalan dəriyə vurmaqdır.

Xüsusilə boyun, körpücük sümüyü və biləklərə ətir çəkib dərhal çölə çıxmaq yay aylarında tövsiyə edilmir. Mütəxəssislərin sözlərinə görə, əksər ətirlərin tərkibində spirt və efir yağları olur. Güclü ultrabənövşəyi şüaların təsiri altında bu maddələr dəridə fototoksik reaksiyaya səbəb ola bilər. Nəticədə mikroskopik kimyəvi yanıqlar və uzun müddət qalıcı olan piqment ləkələri yarana bilər. Bu vəziyyət "parfüm dermatiti" kimi tanınır və yaranan ləkələri sonradan aradan qaldırmaq olduqca çətin olur.

İsti havada qoxu niyə dəyişir?
30 dərəcədən yuxarı temperaturda bədən istiliyi artır, dəri daha çox tər və piy ifraz edir. Bu isə ətirin qoxu strukturuna təsir göstərir.

Belə şəraitdə sitrus və yaşıl notlar kimi yüngül üst notlar çox qısa müddətdə buxarlanır. Əvəzində müşk, ənbər, ud, qatran və şirin qoxular kimi ağır əsas notlar daha sürətlə və kəskin şəkildə hiss olunur.

Qış aylarında xoş təsir bağışlayan eyni ətir yayda həm istifadəçidə, həm də ətrafdakılarda baş ağrısı, ürəkbulanma və narahatlıq hissi yarada bilər.

Yayda ətirdən necə istifadə etmək lazımdır?
Mütəxəssislər yay mövsümündə ətirdən istifadə qaydasını dəyişməyi tövsiyə edirlər. Saç üçün nəzərdə tutulmuş xüsusi ətir spreylərindən istifadə etmək daha məqsədəuyğundur. Belə məhsullar adətən spirtsiz olur, saçları qurutmur və qoxunu uzun müddət saxlayır.

Ətiri birbaşa dəriyə deyil, pambıq və ya kətan paltarların daxili tikiş hissələrinə vurmaq da yaxşı seçim hesab olunur. Lakin əvvəlcə parçanın ləkələnmədiyinə əmin olmaq tövsiyə edilir. Əgər ətiri mütləq dəriyə vurmaq istəyirsinizsə, günəş şüalarının düşmədiyi nahiyələri seçmək lazımdır. Məsələn, saçın altında qalan boyun nahiyəsi və ya dizin arxa hissəsi bunun üçün daha uyğun hesab edilir.

Mütəxəssislər vurğulayırlar ki, bu sadə qaydalara əməl etməklə həm dərini günəşin mənfi təsirindən qorumaq, həm də isti havalarda ətirin daha xoş və balanslı hiss olunmasını təmin etmək mümkündür.

Telegramda izləyin