Uşağı məktəbə getmək istəməyən ata səbəbi öyrənədə şok oldu

Türkiyənin İstanbul şəhərinin Böyükçekmece rayonunda yerləşən özəl təhsil və reabilitasiya mərkəzində təhsil alan 10 yaşlı uşağın müəllimi tərəfindən zorakılığa məruz qaldığı iddia edilir. Hadisə uşağın atasının sinfi pəncərədən izləyərək mobil telefonla çəkdiyi görüntülərdən sonra üzə çıxıb.

Sonxeber.az xaricin mediaya istinadla xəbər verir ki, öyrənmə çətinliyi yaşayan 10 yaşlı uşaq inkişafının dəstəklənməsi məqsədilə reabilitasiya mərkəzinə yerləşdirilib. Bir müddət sonra uşağın mərkəzə getmək istəməməsi, qorxu və narahatlıq nümayiş etdirməsi valideynlərdə şübhə yaradıb.

Ata vəziyyəti araşdırmaq üçün reabilitasiya mərkəzinə gedərək sinfi kənardan izləyib. Onun iddiasına görə, müəllimin uşağa fiziki zorakılıq göstərdiyini görən ata həmin anları mobil telefonla qeydə alıb.

Ailə topladığı görüntülərlə polisə müraciət edərək həm zorakılıq etdiyi iddia olunan müəllim, həm də hadisədə səhlənkarlığa yol verdiyi iddia edilən reabilitasiya mərkəzinin rəhbərliyi barədə şikayət edib.

Şikayətdən sonra hadisə ilə bağlı cinayət və inzibati araşdırma başladılıb. Polis əməkdaşları müəllim Halil İbrahim K.-nı saxlayıb. Şübhəli istintaq hərəkətlərindən sonra məhkəməyə göndərilib.

Hadisə ilə bağlı araşdırmalar davam edir. Burada qeyd olunan zorakılıq iddiaları istintaqın nəticələri ilə hüquqi qiymətini alacaq.

Telegramda izləyin