İtaliyanın mirvarisi - Az adamın bildiyi nağıl evləri olan ada

İtaliyanı izdihamsız, sakit və daha autentik şəkildə kəşf etmək istəyənlər üçün Neapol körfəzində yerləşən Proçida adası ideal seçim hesab olunur. Əksər turistlər məşhur Kapri adasına üz tutduğu halda, Proçida rəngarəng küçələri, sakit atmosferi və təbii gözəlliyi ilə diqqət çəkir.

Lent.az xarici mediaya istinadla xəbər verir ki, uzun illər kütləvi turizmdən kənarda qalan Proçida kiçik ölçüsünə baxmayaraq, ideal istirahət üçün lazım olan hər şeyə malikdir.

Pastel rəngli evləri, dar daş küçələri və sakit ab-havası adaya xüsusi cazibə verir. 2022-ci ildə İtaliyanın Mədəniyyət Paytaxtı seçilən Proçida bu statusa baxmayaraq özünəməxsusluğunu qoruyub saxlayıb və kütləvi turizm məkanına çevrilməyib.

Hər zövqə uyğun çimərliklər
Adanın kiçik olmasına baxmayaraq, burada müxtəlif mənzərələrə rast gəlmək mümkündür. Firuzəyi dənizə enən sıldırım qayalar, vulkan mənşəli qara qumlu çimərliklər və sakit körfəzlər Proçidanı fərqləndirən əsas xüsusiyyətlərdəndir.

Ən məşhur çimərliklərdən biri olan Chiaiolella ailəvi istirahət üçün əlverişli sayılır. Buradan Vivara adasına gözəl mənzərə açılır, dəniz isə sakit və dayaz olduğu üçün uşaqlarla dincəlmək istəyənlər üçün təhlükəsiz seçim hesab edilir.

Sakitlik sevənlər isə adanın kənarındakı kiçik və vəhşi körfəzlərdə təbiətin toxunulmamış gözəlliyindən həzz ala, gün batımını izləyə bilərlər.

Marina Korriçella - adanın ən məşhur guşəsi
Proçidanın ən tanınmış məkanı keçmiş balıqçı kəndi olan Marina Korriçelladır. Bu hissəyə yalnız piyada getmək mümkündür. Burada avtomobil hərəkəti yoxdur, yalnız dalğaların səsi, rəngarəng evlər və sakit küçələr qonaqları qarşılayır.

Daş pilləkənlər, tağlar və kiçik terraslar bu məkanı nağıl səhnəsini xatırladır. Sahil boyunca yerləşən ailə restoranlarında gündəlik ovlanan təzə balıq və dəniz məhsullarından hazırlanan yeməklər təqdim olunur. Məhz bu sadə və səmimi atmosfer Marina Korriçellanı İtaliyanın ən çox şəkil çəkdirilən yerlərindən birinə çevirib.

"Slow Travel" sevənlər üçün ideal məkan
Proçidada həyat böyük şəhərlərin səs-küyündən tamamilə fərqlidir. Ada sakinləri əsasən balıqçılıq və sənətkarlıqla məşğul olur, boş vaxtlarını isə kiçik meydanlarda söhbət edərək keçirirlər.

Küçələrdə eyvanlardan asılmış paltarlar, kiçik ailə dükanları və qədim memarlıq elementləri burada sanki zamanın yavaş axdığı hissini yaradır.

Proçidaya Neapoldan müntəzəm bərə reysləri fəaliyyət göstərir. Bu da adanı bir neçə günlük istirahət üçün əlçatan edir. Burada həm dəniz kənarında dincəlmək, həm İtaliyanın yerli mədəniyyəti ilə yaxından tanış olmaq, həm də izdihamdan uzaq sakit günlər keçirmək mümkündür. Hazırda Proçida hələ də kütləvi turist axınına məruz qalmadığı üçün İtaliyanın ən gizli və cazibədar istirahət məkanlarından biri hesab olunur.

Telegramda izləyin