Toy karvanı ilə yolu bağlayan sürücülərə ağır cəza verildi - VİDEO

Türkiyənin Mersin şəhərində toy karvanı təşkil edərək yolu bağlayan və digər hərəkət iştirakçılarının təhlükəsizliyini riskə atan 7 sürücü barəsində ciddi tədbirlər görülüb.

Sonxeber.az xarici mediaya istinadla xəbər verir ki, hadisə şəhərin ən işlək küçələrindən olan 17-ci prospekt, Nevit Kodallı prospekti ilə kəsişmə və 34-cü prospekt ərazisində baş verib. Toy karvanında iştirak edən avtomobillərin yolu tamamilə bağlaması və nəqliyyatın hərəkətini iflic etməsi barədə daxil olan məlumatdan sonra polis araşdırmaya başlayıb.

Mersin İl Polis İdarəsinin Yol Hərəkətinə Nəzarət Şöbəsinin əməkdaşları Şəhər Təhlükəsizlik İdarəetmə Sistemi (KGYS) kameralarının görüntülərini ətraflı təhlil edərək qayda pozuntusuna yol verən 7 avtomobili və onların sürücülərini müəyyənləşdiriblər.

Qayda pozan sürücülərə ümumilikdə 695 min 862 lirə məbləğində inzibati cərimə tətbiq olunub. Bundan əlavə, onların sürücülük vəsiqələri 2 ay müddətinə geri alınıb, avtomobilləri isə 60 gün müddətinə istismardan kənarlaşdırılaraq cərimə meydançasına yerləşdirilib. Polisi bildirib ki, bu cür qayda pozuntularına qarşı nəzarət tədbirləri davam etdiriləcək.

Telegramda izləyin