Macarıstanda "Pakş" AES 44 ildə ilk dəfə söndürüləcək

Macarıstanın Baş naziri Peter Madyar havaların anomal isti keçməsi və Dunay çayında suyun səviyyəsinin kəskin azalması səbəbindən "Pakş" Atom Elektrik Stansiyasının (AES) tam dayandırılacağını açıqlayıb.

Oxu.Az xəbər verir ki, o, bu barədə "Facebook" hesabında paylaşım edib.

Baş nazir bildirib ki, Dunay çayında suyun səviyyəsinin daha da aşağı düşməsi ilə əlaqədar avqustun 2-nə keçən gecə saat 01:30-da (Bakı vaxtı ilə saat 03:30) stansiyanın sondan əvvəlki enerji bloku da söndürüləcək.

"Beləliklə, stansiyanın gücü 240 meqavata qədər azalacaq və səhər saatlarında, son 44 ildə ilk dəfə olaraq, "Pakş" AES tamamilə fəaliyyətini dayandıracaq", - deyə Peter Madyar qeyd edib.

Bundan əvvəl "Reuters" agentliyi xəbər vermişdi ki, Macarıstan hökuməti Dunay çayında suyun səviyyəsinin aşağı düşməsi səbəbindən "Pakş" AES-in fəaliyyətinin bir neçə həftəlik dayandırılmasına icazə verib. Bildirilir ki, suyun azalması reaktorların soyudulması prosesini çətinləşdirir. İlkin plana əsasən, stansiyanın fəaliyyətini avqustun 3-də dayandırması nəzərdə tutulurdu.

Qeyd edək ki, Mərkəzi Avropada müşahidə olunan anomal istilər və quraqlıq nəticəsində Dunay çayında suyun səviyyəsi son illərin ən aşağı həddinə enib. Macarıstanın iqtisadiyyat və energetika naziri İştvan Kapitan yaranmış vəziyyəti ölkə üçün misli görünməmiş hadisə kimi qiymətləndirib.

Telegramda izləyin