AB dondurulmuş Rusiya aktivlərindən əldə edilən 1,4 milyard avronu Ukraynaya ayıracaq

Avropa Birliyi Rusiyanın dondurulmuş mərkəzi bank aktivlərindən əldə olunan faiz gəlirlərinin 1,4 milyard avro həcmində hissəsini Ukraynaya dəstək məqsədilə istifadə edəcəyini açıqlayıb.

Sonxeber.az Reuters-ə istinadən xəbər verir ki, Avropa Komissiyasının prezidenti Ursula fon der Lyayenin sözlərinə görə, bu vəsait Ukraynanın müdafiəsini və ölkənin Rusiyanın davam edən hücumlarına qarşı müqavimətini gücləndirmək üçün ayrılacaq. Bildirilib ki, sözügedən məbləğ Rusiyanın 2022-ci ildə Ukraynaya genişmiqyaslı hücumundan sonra Avropada dondurulan aktivlərin faiz gəlirlərindən formalaşıb.

Məlumata görə, vəsait avqustun 3-də rəsmi olaraq Avropa İttifaqının sərəncamına verilib. Aİ rəhbərliyi hesab edir ki, Rusiya Ukraynada törətdiyi dağıntılara görə məsuliyyət daşımalıdır və bu səbəbdən həmin gəlirlərin Ukraynanın xeyrinə istifadəsi ədalətli addımdır. Bu qərar Ukraynaya hərbi və maliyyə dəstəyinin davam etdirilməsi istiqamətində Avropa İttifaqının atdığı növbəti addım kimi qiymətləndirilir.

Telegramda izləyin