The Wall Street Journal: "ABŞ kəşfiyyatı Putinin NATO-nu məhdud hücumla sınağa çəkə biləcəyi barədə xəbərdarlıq edir"

ABŞ kəşfiyyat orqanları Rusiya Prezidenti Vladimir Putinin yaxın bir neçə il ərzində NATO-nun birliyini yoxlamaq məqsədilə alyans üzvü olan ölkələrdən birinə məhdudmiqyaslı təxribat xarakterli hücum təşkil edə biləcəyi qənaətinə gəlib. Bu barədə The Wall Street Journal məlumat yayıb.

Nəşrin yazdığına görə, mümkün ssenarilər arasında kiberhücumlar, tanınma nişanı olmayan silahlı qrupların fəaliyyəti və ya kiçikmiqyaslı sərhəd insidentləri yer alır.

Sonxeber.az The Wall Street Journal-a istinadən xəbər verir ki, ABŞ kəşfiyyatı hesab edir ki, belə addımların məqsədi NATO-nun kollektiv müdafiə prinsipini və üzv ölkələrin bir-birinə dəstək vermək iradəsini sınaqdan keçirmək ola bilər.

Məqalədə bildirilir ki, bu qiymətləndirmə Rusiya-Ukrayna müharibəsinin davam etdiyi və Moskvanın Qərblə qarşıdurmasının dərinləşdiyi bir dövrdə hazırlanıb. Ekspertlərin fikrincə, Kreml genişmiqyaslı müharibədən daha çox məhdud təxribatlar vasitəsilə Qərbin reaksiyasını yoxlamağa cəhd göstərə bilər.

Bununla yanaşı, The Wall Street Journal ABŞ-ın Ukrayna və Yaxın Şərqdəki münaqişələr fonunda bəzi yüksək dəqiqlikli sursat ehtiyatlarının azaldığını da qeyd edir. Bununla belə, Pentaqon ABŞ ordusunun bütün mümkün təhlükələrə cavab vermək üçün kifayət qədər imkanlara malik olduğunu bildirir.

Telegramda izləyin