Naxçıvanda mövcud problemlərin həlli üçün güclü iradə və maliyyə resursları vardır

Azərbaycan Prezidenti İlham Əliyev və birinci xanım Mehriban Əliyeva avqustun 11-də Naxçıvan Muxtar Respublikasına səfərə gəliblər. Səfər çərçivəsində Naxçıvanda bir sıra obyektlərin açılışında, təməlqoyma mərasimlərində və həyata keçirilən işlərin vəziyyəti ilə tanış olduqdan sonra Prezidenti İlham Əliyev Azərbaycan Televiziyasına geniş müsahibə verib.

Prezident seçildiyi 2003-c ildən bəri ölkə başçısı Naxçıvana 17 səfər edib. Hər bir səfərin böyük mənası və gözəl nəticələri olduğunu vurğulayan cənab Prezident bu illər ərzində bir çox önəmli layihələrin icra olunduğunu və Naxçıvanın ümumi inkişafının təmin edildiyini bildirib. Son illər ərzində Naxçıvanda ayrı-ayrı istiqamətlər üzrə görülən və görüləcək işlərə toxunan ölkə başçısı bölgədə çox böyük maraq doğuran Naxçıvanın gələcək inkişaf planlarından da söz açıb.

Müsahibədə ilk növbədə təhlükəsizlik məsələlərinə toxunulub. Prezident İlham Əliyev Azərbaycan Silahlı Qüvvələrinin bölgədə söz sahibi olduğunu deyib. Dövlətimizin başçısı, həmçinin Naxçıvanda hərbi potensialın gündən-günə gücləndirildiyini və bundan sonra da gücləndiriləcəyini bildirib.

Ölkə başçısı bu gün Azərbaycanın regionda elektrik enerjisi ilə problemi olmayan nadir ölkə olduğunu bildirib. "Çünki bu və ya digər səbəblər üzündən bölgəmizdə enerji böhranı yaşanmaqdadır və bu böhran dərinləşə bilər. Həm bölgəmizdə gedən müharibələr, həm artan risklər, enerji daşıyıcılarının nəqli ilə bağlı nəqliyyat zəncirlərinin qırılması və digər amillər. İstisna edilmir ki, gələcəkdə yeni xoşagəlməz hadisələr baş verməsin", - deyə dövlətimizin başçısı vurğulayıb.

Geniş maraq doğuran ikinci əsas məsələ enerji təhlükəsizliyi ilə bağlı idi. Bu məsələ də öz həllini tapıb və artıq Naxçıvan enerjinin ixracı ilə məşğul olacaq. Hazırda Naxçıvanda Günəş enerjisinin potensialı çox böyükdür. Aparılan monitorinq və dəqiq təhlil əsasında Günəş elektrik enerjisinin istehsalı üçün Azərbaycan ərazisində ən əlverişli məkan Naxçıvandır. Artıq Naxçıvanda yüzlərlə meqavat gücündə Günəş elektrik stansiyalarının inşa ediləcəyi 600 hektardan çox ərazi müəyyən edilib. "Qonşu ölkələrə ixrac imkanlarımızı genişləndirərək biz, eyni zamanda, Avropa bazarına da çıxacağıq. Çünki biz indi Avropaya neftimizlə, qazımızla çıxmışıq. Ancaq biz elektrik enerjisi ilə də çıxmaq istəyirik", - deyə dövlətimizin başçısı qeyd edib.

Naxçıvan Sənaye Parkının yaradılması bölgədə işsizliyin aradan qaldırılmasına böyük təkan verəcəkdir. Naxçıvanda müasir sənaye komplekslərinin, həmçinin sosial infrastrukturun yaradılması və bərpası nəzərdə tutulur. Həmçinin, uşaq bağçalarının tikintisinə, təmirinə ehtiyac vardır ki, bu işlər həyata keçiriləcəkdir.
Hazırda Naxçıvan şəhərinin nəqliyyat problemləri həll olundu. Səfər zamanı ölkə başçısına yeni elektrik avtobuslarının təqdimatı oldu və xəttə buraxılacaq bu nəqliyyat vasitələri problemi kökündən aradan qaldıracaqdır. Şəhərlərarası və rayonlararası nəqliyyat problemlərinin aradan qaldırılması üçün ölkə başçısı tərəfindən 217 müasir avtobusun alınaraq marşruta buraxılması tapşırığı verilib.

Naxçıvanda əsas yollar qənaətbəxş vəziyyətdə olmasi ilə yanaşı kənd yolları yenə də nasaz vəziyyətdədir. Bununla əlaqədar təqribən 420 kilometr uzunluğunda müxtəlif kateqoriyalı yolların həm çəkilişi, həm əsaslı təmiri nəzərdə tutulur. Bununla da 160 min nəfər sakinin yaşadığı 26 yaşayış məntəqəsində yol problemi öz həllini tapacaqdır.
Gündəlikdə olan məsələlərdən biri də Ordubad rayonunun Tivi kəndindəki 15 meqavatdan bir qədər çox gücdə su elektrik stansiyasının layihəsidir. Bu stansiyanın davam etdirilməsi üçün dövlət tərəfindən vəsait ayrılacaqdır. Burada yerli investorlar tərfində 50 meqavatlıq Günəş elektrik stansiyaları inşa edilir. Xarici investorlar da bura maraq göstərirlər.

Naxçıvan çox zəngin tarixə və mədəniyyətə, o cümlədən memarlıq mədəniyyətinə malikdir. Naxçıvan qədim Atabəylər dövlətinin paytaxtı olub və o dövrə, ondan sonrakı dövrə aid olan bir çox abidələr dünya əhəmiyyətli abidələrdir. Bununla əlaqədar, Naxçıvanın tarixi-mədəni abidələrinin qorunması məsələləri ölkə başçısının nəzarətində olan məsələlərdən biridir. AzTV-yə müsahibəsində dövlətimizib başçısı bu məsələni xüsusi qeyd edərək deyib: "Möminə xatun məqbərəsinin bərpası ilə bağlı görülən işlər bu gün mənə təqdim edildi. Eyni zamanda, digər tarixi-mədəni obyektlərin konservasiyası, qorunması və bərpası nəzərdə tutulur. Möminə xatun məqbərəsinin müəllifi məşhur naxçıvanlı memar Əcəmi Naxçıvaninin şərəfinə abidə ucaldıldı. O abidənin arxasında onun ölməz əsəri Möminə xatun məqbərəsi yerləşir".

Naxçıvanın turizm potensialının çox zəngin olması qeyd ediməlidir. Buranın həm tarixi abidələri, həm gözəl təbiəti, təmiz havası və mənzərəli yerləri var. Ancaq əfsuslar olsun ki, mehmanxanaların az olması və o qədər də səviyyəli olmaması turizmin inkişafını əngəlləyir. Prezident İşham Əliyevin Naxçıvana səfəri çərçivəsində şəhərin mərkəzində beşulduzlu yeni mehmanxananın təməli qoyulub və yəqin ki, təqribən 2028-ci ildə hazır olacaq.
Bu gün Naxçıvanın gələcək inkişafı ilə bağlı bir sıra planlar vardır. bununla bağlı cənab Prezident öz müsahibəsində deyib ki "Bu planların icrası ilə bağlı məndə heç bir şübhə yoxdur. Çünki güclü iradə var, maliyyə resurslarımız da var, heç kimdən də asılı deyilik. Naxçıvanda Qarabağ və Şərqi Zəngəzurdakı kimi idarəetmə üsuli-idarəsini yaratmaqla faktiki olaraq biz bu üç bölgəni inzibati nöqteyi-nəzərindən də birləşdiririk. Təbii ki, Naxçıvan Muxtar Respublikasının muxtar respublika statusu qalmaq şərti ilə, ancaq idarəetmə qaydaları təkmilləşməlidir".

Adil Hüseynov - Azərbaycan Dövlət İqtisad Universitetinın dosentı, iqtisadiyyat üzrə fəlsəfə doktoru

Telegramda izləyin