III Dünya müharibəsi başlayır? - POLİTOLOQDAN AÇIQLAMA

Dünyanın müxtəlif bölgələrində eyni vaxtda davam edən müharibələr və böyük dövlətlər arasında artan qarşıdurma yeni dünya müharibəsi ehtimalı ilə bağlı narahatlıqları gücləndirib. Hazırda Yaxın Şərqdə ABŞ-İran müharibəsinin davam etməsi, Rusiya-Ukrayna cəbhəsində gərginliyin yüksəlməsi, NATO-nun şərq cinahında insidentlərin artması və Asiya-Sakit okean regionunda Çinlə Qərb arasındakı rəqabətin kəskinləşməsi qlobal təhlükəsizlik mənzərəsini daha mürəkkəb vəziyyətə gətirib. Bəzi analitik yazılarda artıq "Üçüncü Dünya müharibəsi" ifadəsi açıq şəkildə işlədilir.

Bununla belə, mövcud vəziyyəti rəsmi olaraq dünya müharibəsinin başlanması kimi qiymətləndirmək hələ mümkün deyil. Əsas narahatlıq ayrı-ayrı regional münaqişələrin bir-biri ilə əlaqələnərək ABŞ, Rusiya, Çin və digər böyük gücləri birbaşa qarşıdurmaya cəlb etməsi və bunun daha geniş müharibəyə çevrilməsi riskidir.

Mövzu ilə bağlı politoloq Rəsul Tağıyev Sonxeber.az-a açıqlamasında bildirdi ki, hazırkı geosiyasi vəziyyət "Üçüncü Dünya müharibəsi başlayıb" deməyə əsas verməsə də, böyük güclər arasında qarşıdurma riskləri əvvəlki dövrlərlə müqayisədə ciddi şəkildə artıb. Onun sözlərinə görə, əsas təhlükə ayrı-ayrı regional münaqişələrin bir-biri ilə əlaqələnməsi və prosesə ABŞ, Rusiya, Çin, NATO və digər güc mərkəzlərinin birbaşa cəlb olunmasıdır: "Hazırda Yaxın Şərqdə davam edən qarşıdurma, Rusiya-Ukrayna müharibəsi və Asiya-Sakit okean regionunda artan gərginlik qlobal təhlükəsizlik sisteminə ciddi təzyiq yaradır. Məsələn, Reuters son günlər Çinlə bağlı hərbi və strateji fəallığın artdığını, Avropada isə Rusiyanın hibrid hücumları ilə bağlı narahatlığın gücləndiyini yazır.

Hazırda əsas məsələ dünya müharibəsinin artıq başlayıb-başlamaması deyil, mövcud qarşıdurmaların hansı həddə qədər genişlənə biləcəyidir. Xüsusilə böyük dövlətlərin birbaşa hərbi toqquşmadan yayınması və diplomatik kanalların açıq saxlanılması qlobal eskalasiyanın qarşısının alınmasında həlledici rol oynaya bilər".

Telegramda izləyin