Azərbaycan-Ukrayna münasibətləri köklü dövlətlərarası münasibətlərə malikdir

Azərbaycan Prezidentinin Ukraynanın İrpen şəhərinin "fəxri vətəndaşı" elan edilməsi iki ölkə arasında humanitar və siyasi münasibətlərin yüksək səviyyədə olduğunu göstərən simvolik addımlardan biri kimi qiymətləndirilir. İrpen şəhər şurası bu qərarı Azərbaycanın müharibənin ilk günlərindən şəhərə göstərdiyi dəstək, sosial infrastrukturun bərpasında iştirakı və humanitar yardımlarla əlaqələndirib.

Bəs, İlham Əliyevin İrpenin "fəxri vətəndaşı" elan edilməsi Azərbaycan-Ukrayna münasibətləri baxımından hansı siyasi və diplomatik əhəmiyyət daşıyır və bu addımı Azərbaycanın Ukraynaya göstərdiyi humanitar dəstəyə verilən siyasi qiymət kimi dəyərləndirmək olarmı?
Məsələ ilə bağlı Sonxeber.az-a açıqlama verən politoloq Turan Rzayev bildirib ki, Azərbaycan-Ukrayna münasibətləri olduqca yüksək səviyyədə inkişaf edən münasibətlər sisteminə malikdir.

"Azərbaycan bu gün Ukrayna ərazilərinin işğalı məsələsində Ukraynanın mövqeyini dəstəkləyir və bunu yüksək səviyyədə qeyd edir. Rusiya tərəfindən Ukraynada aparılan əməliyyatları işğalçılıq müharibəsi kimi qiymətləndirir. Cənab Prezident də öz çıxışlarında bunu qeyd edib. Azərbaycan xüsusilə Ukraynaya humanitar yardımlar edir və bu məsələdə dəstəyini ifadə edir. Prinsip etibarilə, Kiyevlə Bakı arasında təmaslar həmişə yaxşı olub. Bunu Prezidentin bu gün qəbul etdiyi keçmiş prezident Viktor Yuşşenkonun timsalında da görə bilərik. Keçmiş prezident olmasına baxmayaraq, ölkə başçısı onu dostu və hörmət etdiyi şəxs kimi qiymətləndirir. Bu, əslində onu göstərir ki, Azərbaycan-Ukrayna münasibətləri ayrı-ayrı şəxslərə əsaslanmır, köklü dövlətlərarası münasibətlərə malikdir".

Politoloq bildirib ki, bu baxımdan, Ukraynanın İrpin şəhərinin Azərbaycan Prezidentinə fəxri vətəndaş adını verməsi də simvolik və diplomatik jestdir:

"Mənə elə gəlir ki, bu tipli addımlarla Ukrayna Azərbaycanı və Azərbaycan vətəndaşlarını, o cümlədən ölkə başçısını özünə yaxın tərəf kimi qiymətləndirdiyini diplomatik-siyasi jestlərlə ifadə edir. Hesab edirəm ki, bu, mühüm və ciddi addımdır. Əlbəttə, bunu Azərbaycanın Ukraynaya verdiyi humanitar dəstəyə simvolik jest kimi də qiymətləndirmək olar. Azərbaycan ümumiyyətlə beynəlxalq hüququn prinsip və normalarını dəstəkləyir. Heç bir gərginliyin və heç bir münaqişənin müharibə yolu ilə həllinin tərəfdarı deyilik. Belə bir vəziyyət yarandıqda isə hər zaman beynəlxalq hüquq çərçivəsində haqlının yanında oluruq".

Onun sözlərinə görə, Azərbaycan özü də 30 il ərzində torpaqlarının işğal altında olması ilə bağlı vəziyyətlə üzləşib və faktiki olaraq ikili standartlara məruz qalıb:

"İşğalçı ilə işğala məruz qalan arasındakı fərq uzun müddət göstərilmirdi. Azərbaycan isə buna rəğmən öz torpaqlarını işğaldan azad etdi. Cənab Prezidentin çıxışlarının birində belə bir ifadə işlətdiyini xatırlayıram: Ukrayna xalqı səbirli və təmkinli olmalıdır, haqq-ədalət bir gün öz yerini tapır. O baxımdan hesab edirəm ki, iki ölkə arasındakı münasibətlər inkişaf edir və gələcəkdə də bunun şahidi olacağıq. Ölkələr arasında xüsusi bir problem yoxdur. Ukraynanın Azərbaycana, yaxud Azərbaycanın Ukraynaya hər hansı incikliyi yoxdur. Əksinə, Azərbaycan Ukraynaya dəstək verən ölkələrdəndir".

Ekspert qeyd edib ki, ən mühüm məqamlardan biri də Azərbaycanın Rusiya-Ukrayna müharibəsində sərgilədiyi balanslı mövqedir:

"Bu mövqe gələcək perspektivdə Bakı və Azərbaycanın digər şəhərlərini Rusiya-Ukrayna danışıqları üçün alternativ və təhlükəsiz məkan kimi nəzərdən keçirməyə imkan verir. Gələcəkdə Bakının vasitəçiliyi ilə və ya Bakının ev sahibliyi ilə belə danışıqların keçirilməsi mümkündür".

Röyalə Xəyal

Telegramda izləyin