Silahla oynayarkən yaralanan 16 yaşlı yeniyetmə öldü

Türkiyənin İzmir vilayətinin Tire rayonunda evdə silahla oynayarkən tapançanın təsadüfən atəş açması nəticəsində qarnından güllə yarası alan 16 yaşlı Yiğit Can Bişkin həyatını itirib.

Sonxeber.az xarici mediaya istinadla xəbər verir ki, hadisə Tire rayonunun İsmail Taşlı küçəsində yerləşən evdə baş verib. Məlumata görə, Bişkin evdə olduğu vaxt tapança ilə oynamağa başlayıb. Bu zaman silahın qəfil atəş açması nəticəsində yeniyetmə qarnından yaralanaraq yerə yıxılıb.

Silah səsini eşidən qonşular təcili yardım çağırıb. Hadisə yerinə gələn tibbi briqada ağır yaralanan Bişkinə ilkin yardım göstərərək onu Tire Dövlət Xəstəxanasına çatdırıb. Vəziyyəti ağır olan yeniyetmə daha sonra İzmir Şəhər Xəstəxanasına köçürülüb. Həkimlərin bütün səylərinə baxmayaraq, onun həyatını xilas etmək mümkün olmayıb.

Hadisədən sonra polis silahın təsadüfən atəş açıb-açmadığını müəyyənləşdirmək üçün araşdırmaya başlayıb. İstintaq çərçivəsində hadisə zamanı Bişkinin yanında olduğu müəyyən edilən 16 yaşlı Ç.K. saxlanılıb.

Məhkəməyə çıxarılan Ç.K. barəsində həbs qərarı verilib və o, cəzaçəkmə müəssisəsinə göndərilib. Hadisə ilə bağlı araşdırma davam edir.

Telegramda izləyin