Mənzilə girib qutuları oğurladılar, içindən görün nə çıxdı - VİDEO

Türkiyənin Eskişehir şəhərinin Odunpazarı rayonunda kaskalı 3 şübhəli mənzilin qapısını sındıraraq içəri daxil olub və içərisində narkotik həblərin olduğu 3 böyük qutunu oğurlayaraq motosikletlə hadisə yerindən qaçıb.

Sonxeber.az xarici mediaya istinadla xəbər verir ki, hadisə gecə saatlarında Böyükdərə məhəlləsi, Gülersoy küçəsində yerləşən yaşayış binasının 10 nömrəli mənzilində baş verib. Məlumata görə, üzlərini kaskla gizlədən 3 şübhəli binanın və mənzilin qapısını sındıraraq içəri daxil olub. Onlar mənzildə olan narkotik həblərlə dolu 3 böyük qutunu götürərək qaçıblar.

Şübhəlilərin qaçışı zamanı qutulardakı həblərin bir hissəsi yola səpilib. Səs-küyə çıxan məhəllə sakinləri şübhəlilərin qutuları motosikletə yükləyərək ərazidən uzaqlaşdığını görüblər. Qaçarkən park edilmiş bir neçə avtomobilə çırpılan şübhəlilər nəqliyyat vasitələrinə də ziyan vurublar.

Hadisə barədə polisə məlumat verildikdən sonra əraziyə gələn əməkdaşlar mənzildə və küçədə araşdırma aparıblar. Şübhəlilərin tutulması üçün genişmiqyaslı əməliyyat başladılıb.

Hadisənin şahidi olan Fırat Yılmaz bildirib ki, gecə saatlarında 10 nömrəli mənzildən güclü səs-küy gəlib və qapıya təpiklə vurulduğunu eşidiblər. Aşağı düşdükdə mənzilin qapısının sındırıldığını və bir şəxsin əlində qutularla binadan çıxdığını gördüyünü deyib.

Yılmazın sözlərinə görə, polisə məlumat verildikdən sonra əməkdaşlar əraziyə gələrək araşdırma aparıblar. O, qaçan şəxslərin motosikletlə gəldiyini və qutuları apararkən bir neçə avtomobilə də zərər vurduqlarını bildirib.

Polis ekipajları hadisə ilə bağlı araşdırmanı davam etdirir.

Telegramda izləyin