"TikTok" məxfiliyi pozduğuna görə ABŞ-yə 400 milyon dollar ödəyəcək

ABŞ Ədliyyə Nazirliyi, "TikTok" platforması və bu sosial şəbəkəni yaradan "ByteDance" şirkəti internetdə yetkinlik yaşına çatmayanların məxfiliyinin qorunması haqqında qanunvericiliyin pozulması ilə əlaqədar 2014-cü ildə başlanmış məhkəmə çəkişməsinin həlli üçün Amerika hökumətinin xeyrinə 400 milyon dollar ödənilməsi barədə razılığa gəlib.

"Report" xəbər verir ki, bu barədə qurumun mətbuat xidmətinin bəyanatında deyilir.

Qeyd edilib ki, iddia qaldırıldıqdan sonra "TikTok"da mülkiyyət strukturunda, idarəetmə heyətində, tənzimləyici normalara riayət sistemlərində və məxfiliyin təmin edilməsi yanaşmalarında əhəmiyyətli dəyişikliklər aparılıb.

Ədliyyə Nazirliyindən bildirilib ki, 400 milyon dollar məbləği fərdi məlumatların qorunması haqqında qanunvericiliklə bağlı işlər çərçivəsində razılaşdırılmış ən əhəmiyyətli kompensasiyalardan biridir. Barışıq sazişinin şərtlərinə əsasən, platforma yetkinlik yaşına çatmayan istifadəçilər üçün qoruyucu mexanizmləri gücləndirməyi, yaşın yoxlanılması sistemini təkmilləşdirməyi, həmçinin valideynlərə övladlarının "TikTok"dakı fəaliyyətinə daha dolğun nəzarət etmək imkanı verən alətləri tətbiq etməyi öhdəsinə götürür.

Bununla belə, platformanın özü irəli sürülmüş ittihamlar üzrə təqsirini qəbul etməyib.

Telegramda izləyin