Klinik ölüm keçirən ispaniyalıdan qeyri-adi açıqlamalar: "Ruhumun bədənimdən ayrıldığını gördüm"

Ürəyi bir saat ərzində dayanan və klinik ölüm yaşayan ispaniyalı Eduardo sosial şəbəkələrdə maraqlı açıqlamalar verib.

Oxu.Az xəbər verir ki, bu barədə "Mirror" nəşri məlumat yayıb.

Məlumata görə, ötən ilin fevralında sağlam və fiziki cəhətdən gümrah olan bu şəxs tennis oynayarkən qəfil özünü pis hiss edib və xəstəxanada ona üç dəfə reanimasiya tətbiq olunub.

Eduardo qeyd edib ki, klinik ölüm halında olarkən dünyasını dəyişmiş babasını məhkəmə zalında görüb. Orada ona "tamamlanmamış missiya"ya görə geri dönməli olduğu bildirilib.

Həmçinin o, ruhunun bədənindən ayrıldığı anda təcili tibbi yardım avtomobilinin üzərində olduğunu və huşsuz vəziyyətdə başqa bir xəstəxanaya köçürülərkən bunu dərk etdiyini vurğulayıb. Bütün bu yaşadıqları onda axirət həyatının varlığına inam yaradıb.

İspaniyalının sözlərinə görə, məhkəmə prosesi zamanı vəfat etmiş babası onun yanında olub və küləyin vasitəsilə yenidən həyata qayıtmasına dəstək göstərib. Yaşadığı bu vəziyyət ona tamamilə gerçək kimi gəlsə də, o, həyat üçün darıxmadığını bildirib. Özünə gəldikdə isə xəstəxanaya yerləşdirilməsinə təəccüblənib.

Telegramda izləyin