Ərazi bütövlüyü və daxili işlərə qarışmamaq kimi beynəlxalq hüququn təməl prinsiplərinə söykənən münasibətlərqarşılıqlı dəstəklə müşayiət olunur

"Türkmənbaşı şəhərində keçirilən Mərkəzi Asiya və Azərbaycan Dövlət Başçılarının Məşvərət görüşündə səsləndirilən fikirlər Bakı və Aşqabad arasında strateji dialoqun keyfiyyətcə yeni müstəviyə keçdiyini nümayiş etdirir. Siyasi-hüquqi baxımdan bu çıxış tərəflərin ikitərəfli müqavilə-hüquq bazasını daha da möhkəmləndirmək, eləcə də regional təhlükəsizlik və iqtisadi inteqrasiya mexanizmlərində birgə mövqedən çıxış etmək iradəsini təsdiqləyir". Bu sözləri Sonxeber.az-a açıqlamasında millət vəkili Bəhruz Məhərrəmov bildirib.

Onun sözlərinə görə, tərəflər arasında suverenlik, ərazi bütövlüyü və daxili işlərə qarışmamaq kimi beynəlxalq hüququn təməl prinsiplərinə söykənən münasibətlər çoxtərəfli platformalarda qarşılıqlı dəstəklə müşayiət olunur: "İki dövlət arasındakı geosiyasi tərəfdaşlığın əsas dayaqlarından birini Xəzər dənizinin hüquqi statusuna dair Konvensiyanın tələblərinə uyğun olaraq nəqliyyat-logistika və energetika sahələrindəki əməkdaşlıq təşkil edir. Azərbaycan və Türkmənistanın Xəzər dənizi üzərindən tranzit potensialının birləşdirilməsi, Orta Dəhliz və Şimal-Cənub nəqliyyat marşrutlarının funksionallığının artırılmasına yönəlmiş hüquqi və inzibati prosedurların unifikasiyasını tələb edir. Bu kontekstdə Bakı Beynəlxalq Dəniz Ticarət Limanı ilə Türkmənbaşı Beynəlxalq Dəniz Limanı arasında logistik inteqrasiya və gömrük-keçid rejiminin optimallaşdırılması xüsusi siyasi-hüquqi əhəmiyyət kəsb edir. Energetika sektorunda ticarət dövriyyəsinin həcminin artması və birgə resursların istismarı üzrə atılan addımlar tərəflərin iqtisadi suverenliyini gücləndirir və geoiqtisadi mövqelərini möhkəmləndirir. Eyni zamanda, "yaşıl enerji" keçidi və bərpa olunan enerji dəhlizlərinin yaradılması təşəbbüsləri hər iki ölkənin beynəlxalq iqlim öhdəlikləri və regional enerji təhlükəsizliyi arxitekturasında birgə rolunu artırır.

Möhtərəm Prezidentin bu gün Azərbaycan Respublikası və Mərkəzi Asiya Dövlət Başçılarının 8-ci Məşvərət görüşündəki çıxışında da əks olunan prioritetlər bir daha göstərməkdədir ki, Azərbaycan və Türkmənistan münasibətlərinin təkcə ikitərəfli çərçivədə deyil, həm də Mərkəzi Asiya və Cənubi Qafqaz regionlarının strateji yaxınlaşması kontekstində institutlaşdığını və uzunmüddətli hüquqi-siyasi tərəfdaşlığa söykənir".

Müəllif: İlkin Məmmədkərimov

Telegramda izləyin