Şuşanın azad olunması 44 günlük müharibənin taleyini necə dəyişdi? - AÇIQLAMA

"Şuşanın azad olunması hərbi-siyasi tariximizin ən böyük hadisələrindən biridir. Bu hadisənin həm ondan əvvəl baş verən proseslərin yekunlaşmasında, həm də sonrakı hadisələrin müəyyənləşməsində çoxşaxəli təsirləri olub. Şuşanın azad edilməsi 44 günlük Vətən müharibəsinin taleyini həll etdi. Çünki bu hadisədən sonra Ermənistan və onun arxasında dayanan qüvvələr başa düşdülər ki, hərbi əməliyyatlar baxımından Ermənistan silahlı qüvvələrinin Azərbaycanın qarşısında duruş gətirmək imkanları tükənib".

Bu sözləri Sonxeber.az-a açıqlamasında siyasi şərhçi Aydın Quliyev bildirib.

"Qeyd edim ki, 44 günlük müharibənin hansı nəticə ilə yekunlaşacağı ilə bağlı Rusiyanın fərqli planları var idi. Şuşanın azad olunması Rusiyanın maraqlarına uyğun deyildi. Rusiya istəyirdi ki, Şuşa da daxil olmaqla, Azərbaycanın bir neçə rayonu, o cümlədən Laçın və Kəlbəcər Ermənistanın nəzarəti altında qalsın, Dağlıq Qarabağın ətrafındakı yeddi rayon işğaldan azad edilsin, keçmiş Dağlıq Qarabağın hüquqi statusu məsələsi isə müharibədən sonraya saxlanılsın.

Rusiyanın planı bu istiqamətdə olsa da, Azərbaycan uzaqgörən siyasət yürüdərək Şuşanın azad edilməsinə nail oldu. Bununla da həm müharibənin taleyi həll edildi, həm də Rusiyanın yeni planlarını həyata keçirmək imkanları məhdudlaşdırıldı.

Şuşa azad edildikdən sonra Ermənistan müqavimət göstərməyin mənasız olduğunu başa düşdü. Ardınca kapitulyasiya aktının imzalanması nəticəsində bir neçə rayonun, o cümlədən Kəlbəcər, Ağdam və Laçının döyüşsüz azad edilməsinə nail olduq.

Beləliklə, Şuşanın azad olunması həm 44 günlük müharibənin taleyini həll etdi, həm də Rusiyanın və Ermənistanın bölgədə qeyri-müəyyən müddətə yeni işğal rejimi yaratmaq planlarını alt-üst etdi. Eyni zamanda, qondarma Dağlıq Qarabağ Respublikasının mövcudluğunu bir müddət də davam etdirmək məqsədilə Rusiya və İran tərəfindən qurulan planların qarşısı alındı.

Məhz buna görə Şuşanın azad edilməsi Azərbaycanın hərbi və siyasi tarixində bənzəri olmayan hadisə hesab olunur və olunmalıdır".

Röyalə Xəyal

Telegramda izləyin