Şimali Koreya yenidən ballistik raketlər atdı: ABŞ və müttəfiqləri hərəkətə keçdi

Şimali Koreya Koreya yarımadasında hərbi gərginliyi artıran növbəti addım atıb. Pxenyan noyabrın 4-də ölkənin şərq sahilləri istiqamətində bir neçə ballistik raket buraxıb. Cənubi Koreyanın Birləşmiş Qərargah Rəisləri Komitəsinin məlumatına görə, raketlər Hamgyon-Namdo əyalətinin Sondok bölgəsindən atılıb və 300 kilometrdən az məsafə qət edib. Hazırda onların texniki xüsusiyyətləri araşdırılır. Bunun fonunda ABŞ, Yaponiya və Cənubi Koreya Şimali Koreyanın nüvə silahlarından tamamilə imtina etməsi ilə bağlı ortaq mövqelərini bir daha təsdiqləyiblər. Oktyabrın 30-da keçirilən üçtərəfli görüşdə ölkələrin nümayəndələri Pxenyanın nüvəsizləşdirilməsi, BMT Təhlükəsizlik Şurasının qətnamələrinin icrası və regionda təhlükəsizliyin qorunması məsələlərini müzakirə ediblər. Tərəflər Şimali Koreyaya qarşı müdafiə və çəkindirmə mexanizmlərinin əlaqələndirilməsini davam etdirmək barədə də razılığa gəliblər.

Məsələ ondadır ki, Pxenyan nüvə proqramından imtina etmək niyyətində olmadığını dəfələrlə bəyan edib. Şimali Koreya rəhbərliyinin son açıqlamaları da tərəflər arasında fikir ayrılıqlarının davam etdiyini göstərir. Belə bir şəraitdə ABŞ, Yaponiya və Cənubi Koreyanın birgə mövqeyinin regiondakı hərbi-siyasi vəziyyətə necə təsir göstərəcəyi və Pxenyanın nüvə proqramı ilə bağlı hansı addımları atacağı diqqət mərkəzindədir.
Mövzu ilə bağlı politoloq, Resurs Analitik İnformasiya Mərkəzi İctimai Birliyinin sədri Rasim Quliyev Sonxeber.az-a açıqlamasında bildirdi ki, ABŞ, Yaponiya və Cənubi Koreya xarici işlər idarələrinin rəhbərlərinin görüşündə Şimali Koreyanin nüvəsizləşdirilməsi və Koreya yarımadasının təhlükəsizliyi mövzusunda bəyanatı həmin problemin həlli istiqamətində ümumi müzakirə və növbəti çağırış kimi dəyərləndirilə bilər. Eyni zamanda Şimali Koreyanin nüvəsizləşdirilməsi layihəsinin, çəkindiricilik alətləri və taktikasının hazırlanıb həyata keçirilməsi yollarının mühafizəsi bu istiqamətdə növbəti embarqo və digər təzyiqlərin tətbiqi və danışıqlar etiva edir. Hazırda Şimali Koreyanın nüvə proqramından geri çəkiləcəyi heç inandırıcı deyil, əksinə Şimali Koreya özünü nüvə dövləti elan edərək bunu konstitusiyasında təsbit etmişdir.

Hazırda Şimali Koreyanın nüvə silahlanması proqramını inkisaf etdirməsi bölgə dövlətlərini narahat etsə də yaxın dövrdə hər hansı böyük nüvə müharibəsinin baş verəcəyi inandırıcı deyil. Sadəcə olaraq rəsmi Seul ABŞ ilə Pxeynan arasında bu danışıqların aparılması, Şimali Koreyaya beynəlxalq təzyiqin artırılması nəticəsində nəsə əldə etməyə çalışır, lakin onu da nəzərə almaq lazımdır ki, beynəlxalq müstəvidə də Şimali Koreyanın nüvə dövləti olmasına münasibət birmənalı deyil. Hər halda rəsmi Pxenyana illərdir davam edən təzyiq, embarqo və çəkindiricilik vasitələrinə rəğmən Şimali Koreya nüvə silahlanması və müxtəlif ballistik raket layihələrini yeni sınaqlarla davam etdirir. Amma hazırda ABŞ-nin bölgədə yeni müharibə başlamaq imkanı yoxdur kimi görünür.

Müəllif: İlkin Məmmədkərimov

Telegramda izləyin