Bakıya yağış nə vaxt "yaraşacaq"? - AÇIQLAMA - FOTO - VİDEO

Bakı şəhərinin küçə və yolları yağışın yağması ilə yenə acınacaqlı vəziyyət alıb. Küçələrdə yenidən gölməçələr yaranıb. Yoldan keçən maşınlar piyadaların üst-başını bərbad vəziyyətə salır. Kanalizasiyalar aşıb-daşır. Nəinki qəsəbədaxili küçə və yollar, hətta dayanacaqlar da su içində "batır". Maraqlıdır, "Bakıya yağış yaraşmır" ifadəsi nə vaxt dəyişiləcək ki, yağan yağışa ürəkdən sevinə bilək?

Mövzu ilə bağlı Sonxeber.az-a açıqlamasında Azərbaycan Avtomobil Yolları Dövlət Agentliyinin (AAYDA) İctimaiyyətlə Əlaqələr şöbəsinin rəisi Anar Nəcəfli bildirib ki, küçələr mümkün dərəcədə yağış barmaqlıqları ilə təmin edilir:

"Təmsil etdiyim agentlik, əgər şərait varsa, yolların təmiri və tikintisi zamanı mümkün dərəcədə küçələri yağış barmaqlıqları ilə təmin edir. Yəni həmin sistemi işə salmaq üçün yağış kollektoru yaradılır. Amma bundan əlavə, yağış sularının idarə olunması ilə məşğul olan ayrı qurum var".

Bu gün yağan yağışda çəkilən foto və videoları diqqətinizə çatdırmaq istəyirik. Gözəl və müasir Bakımıza bu görüntü heç yaraşmır.

Aysel Səfərzadə

Telegramda izləyin