Vaksinsiz məktəbə buraxılmayan valideynlər nə etməlidir? - AÇIQLAMA

Son günlər övladlarını məktəbə aparan bəzi valideynlər onlardan "COVID-19" pasportunun tələb olunmasından şikayət edirlər. Təhsil nazirinin "Valideyinlər vaksinsiz də uşaqları məktəbə apara bilər" deməsinə baxmayaraq, bəzi məktəb direktorları, müəllimlər yenə də vaksin pasportu tələb edirlər. Lakin valideynlərin belə bir qanunun olmadığını demək haqqı var. Onlar vaksin vurdurmadan da uşağı qapıyadək ötürə bilərlər.

Məsələ ilə əlaqədar Sonxeber.az-a təhsil eksperti Kamran Əsədov açıqlama verib.

O, hazırda valideynlərlə bağlı məhdudiyyətin olmadığını təsdiqləyib:

"Hazırda Azərbaycanda tədris prosesinin iştirakcısı olan hər bir şəxs mütləq vaksin olunmalıdır. Yəni məcburi tələbdir ki, ali və orta ixtisas müəssisələrində, orta məktəblərdə tədris prosesinin yaşı 18-dən yuxarı olan hər bir iştirakcısı mütləq vaksin olunmalıdır.

Əgər valideyn məktəbdə, dərsdə iştirak etmirsə, məktəbin inzibati binasına daxil olmursa, vaksin vurdurmuş olması vacib deyil. Məktəb tərəfindən belə bir tələb yoxdur. Yox, həmin şəxs restorana və ya vaksin tələb olunan digər yerlərə gedəcəksə, sözsüz ki, vaksin pasportu ona lazımdır.

Valideyn övladını məktəbin qapısına qədər aparır, qapıdan yola salır və işi bitmiş hesab edilir. Həmin şəxsə "Vaksinin yoxdursa, məktəbə gəlmə, uşağın gəlməsin" deyib tələb qoymaq olmaz. Valideynlər rahatlıqla məktəbin qapısına qədər gedə bilərlər və buna görə onlardan heç kim vaksin tələb edə bilməz. Şagirdi də valideynin vaksini olmadığına görə tədris prosesində iştirakdan məhrum etmək qəbuledilməzdir. Şagirdlərin valideyinə görə tədrisdən uzaqlaşdırılması nəzərdə tutulmur və bu yolverilməzdir.

Valideyn yalnız tədrisdə iştirak etmək istədikdə, məktəbə daxil olmaq istədikdə vaksin tələb olunur".

ZAİRA AKİFQIZI

Telegramda izləyin