"İran heç vaxt bizə qarşı səmimi olmayıb" - Deputatdan AÇIQLAMA

"İranın Cənubi Qafqaza yönəlik siyasətini, təəssüflər olsun ki, sülhpərvər siyasət adlandırmaq olmaz".

Bu sözləri Sonxeber.az-a danışan deputat Nəsib Məhəməliyev bildirib.

Deputat qeyd edib ki, üzdə müsəlman həmrəyliyindən, din qardaşlığından, mehriban qonşuluqdan danışaraq, əməldə işğalçı Ermənistana hərtərəfli dəstək vermək siyasi riyakarlıqdır:

"Ən azından ona görə ki, həmin işğalçı sənin dinini təhqir edir, məscidləri dağıdır, orada donuz otarır. Müsəlman uşaqlarını, qadınları qətlə yetirir. Müqəddəs Qurani-Kərimdə də qeyd olunduğu kimi, müsəlman müsəlmanın yanında olmalıdır. Cənub qonşumuz zalımın yanında olduğunu heç zaman gizlətmədi. İran heç vaxt bizə qarşı səmimi olmayıb.

Cəbrayıl rayonuna səfəri çərçivəsində, ən kritik anlarda belə, səbrini, təmkinini qorumağı bacaran ölkə başçımız İranın son təxribatlarına münasibət bildirmək məcburiyyətində qaldı. Azərbaycanın hər zaman qonşuluq prinsiplərinə sadiq qalmasına baxmayaraq, qarşı tərəf bu dostluğu, alicənablığı lazımınca qiymətləndirməyi bacarmayıb. Əksinə, uydurulmuş, əsassız ittihamlarla ölkəmizə qarşı böhtanlar atmaqla məşğuldurlar. Cənab Prezident haqlı olaraq, fakt, dəlil-sübut tələb edir. İttiham səsləndirirsənsə, sübut etməlisən. Münaqişə vəziyyətində olan qonşulara münasibətdə haqqın, ədalətin yanında olmalısan. Heç olmasa, neytrallıq nümayiş etdirməlisən. Yalnız belə olan halda sən böyük ola bilərsən. sənə hörmətlə yanaşarlar. Təəssüflər olsun ki, bu ölkə böyük, ədalətli, dürüst, mehriban qonşu olmağı bacarmadı. Məhz ona görə də, Ermənistanı çıxmaq şərti ilə, bütün qonşuları, İslam dünyası, ümumiyyətlə, dünyanın əksər ölkələri ilə gərgin münasibətdədir, sanksiyalardan əziyyət çəkir, təbiii sərvətlərin bolluğuna baxmayaraq, əhalisi yoxsulluq içində yaşayır".

Deputat vurğulayıb ki, İranın apardığı siyasət, regionun təhlükəsizlik sisteminə təhdiddir və gərginliyi artırır:

"İnanmaq istərdim ki, İran bölgədə yaranmış yeni reallıqları normal qəbul edəcək və sülhün yaranmasında öz töhfəsini verəcək".

Aysel Yusifqızı

Telegramda izləyin