İntiharların artmasında cəmiyyət nə qədər günahkardır? - AÇIQLAMA

Son zamanlar ölkəmizdə intihar sayı durmadan artır. İntihara daha çox cəhd edən isə gənc nəsildir. Bəs bunun üçün psixoloqlar və cəmiyyət nə etməlidir? Belə halların qarşısını almaq üçün insanlar necə maarifləndirilməlidirlər?

Məsələ ilə bağlı Sonxeber.az saytına Azərbaycan-Braziliya Ciu-Citsu Federasiyanın və Qarapapaq Döyüş Klubunun Prezidenti Aqil Acalov fikir bildirib.

Onun sözlərinə görə, müxtəlif yaş qrupları üzrə intihara gətirib çıxaran faktorlar psixoloqlar tərəfindən nəzərə alınaraq, qruplaşdırılıb psixoloji dəstək məqsədli layihələr həyata keçirilməlidir:

"İlk olaraq, intihar xəbərlərinin sıradan xəbərlər kimi sıxlıqla yayımlanmasının düzgün olmadığını düşünürəm. Cəmiyyət olaraq isə, səbəb nə olursa olsun, insanları dinləmədən, anlamadan qınamaqdan uzaq olmalıyıq. Kimisi həyat mücadiləsi verdiyi halda kimisinin asanlıqla sağlam canına qıyması, təbii ki, səbəbsiz deyil. Toplum fərdləri olaraq, bir-birimizi dinləməyə və anlamağa çalışmalıyıq. Hər kəs onun üçün mövcud həmin vəziyyətdə emosional gərginliyə tab gətirməyə bilər. İnsanların mənəvi gücü və hadisələrə yanaşma tərzi fərqlidir.

Heç kəsi hər hansı düşüncə tərzinə görə qınaya, sərt tənqid edə və ya iradəsi, daxili gücü zəifdir deyə kənara itələyə bilmərik.

Düşünürəm ki, müxtəlif yaş qrupları üzrə intihara gətirib çıxaran faktorlar psixoloqlar tərəfindən nəzərə alınaraq qruplaşdırılıb psixoloji dəstək məqsədli layihələr həyata keçirilə bilər. Bu zaman nəinki məhz psixoloji sarsıntısı olan insanlar, həm də onların yaxın ətrafı, ailəsi və sıx ünsiyyətdə olduğu insanlar da maarifləndirilərsə, daha effektiv nəticə əldə etmək olar".

ZAİRA AKİFQIZI

Telegramda izləyin