"Avtobus və metrodan yersiz istifadə etməsinlər" - Həkimdən XƏBƏRDARLIQ

Son günlər yoluxma sayı artır. Bəzi məktəblər və universitetlərdə qruplar distant təhsilə keçib. Xəstəlik hətta uşaqlar arasında da çoxalıb. Bəs belə halda qapanma gözləniləndirmi?

Məsələ ilə bağlı Sonxeber.az saytına infeksionist Vüqar Cavadzədə açıqlama verib.

Onun sözlərinə görə, yoluxmanın artmasına havaların soyuması təkan verib:

"Düzdür, yoluxmalar artıb. Bunun səbəbi isə məktəblər, universitetlər, məktəbəqədər təhsil müəssisələri, metronun açılması, Məhərrəmlik ayı bitdikdən sonra toyların başlamasıdır. Ümumiyyətlə, müəyyən tədbirlərin başlaması yoluxmanın artmasına təkan verib. Bu hal gözlənilən və proqnozlaşdırılan idi. Amma hazırkı vəziyyətdə də görürük ki, təhsil ocaqlarında bəziləri distant təhsilə keçiblər.

Qapanma məsələsinə gəldikdə isə, tutaq ki, oldu. Qapadılandan təxminən bir ay sonra vəziyyət stabilləşəcək, yoluxmalar azalacaq. Sərt karantini ləğv etdikdən sonra, yumşalmaya getdikdə isə, periodik olaraq, yenidən artımlar baş verəcək.

Bu vaxta kimi 3 dəfə qapanmaya getmişik. Qısamüddətdə ciddi müsbət nəticələr alınsa da, sonradan yoluxma sayı yenə artmağa başlayıb. Ona görə də, ciddi qapanmaya ehtiyacın olmadığını hesab edirəm. Hər kəs öz işini bilməlidir, profilaktik tədbirlərə riayət etməlidir. Bir sözlə, insanlar özlərini qorumalıdırlar".

Demək olar ki, insanların çoxu vaksin olunub. Avtobus, metrolarda və ümumən sıxlıq olan ərazilərdə çox az hallarda maskasız insanlara rast gəlinir. Bütün bunlar yoluxmanın qarşısını niyə almır? Hələ də artım varsa, yeni tədbirlər görmənin zamanı deyilmi?

Bu suala cavabımda infeksionist əslində qaydalara tam riayət olunmadığını vurğulayıb.

"Yoluxmanın yenidən artmasına havaların soyuması da bir az təkan verdi. Əlbəttə ki, insanlar özlərini ciddi şəkildə qorumalıdırlar. Məsələn, yaxşı olardı ki, cərrahi maskadan yox, N95 maskalarından istifadə etsinlər, çünki cərrahi maskanın qoruyuculuğu çox azdır.

Günümüzdə qapalı məkanlara çox üz tutmamaq məsləhətdir. Qapalı məkanlarda insanların çox toplaşdığı yerlərə gedilməsə, daha yaxşı olar. Avtobus və metrodakı sıxlığı nəzərə alaraq, ehtiyac olmadan bu nəqliyyat vasitələrdən istifadə olunmamalıdır. Qonaq gedib-gəlmək, xəstə ziyarət etmək, müxtəlif kampaniyalar təşkil etmək təhlükəlidir. İnsanlar yas yerlərinə, xeyir işlərə mümkün qədər toplaşmamalıdırlar. Bunlara riayət etsələr, özlərini qorumuş olarlar.

Amma sadalananların hansına riayət olunur? Heç birinə! Insanlar indi yas yerinə də toplaşır, avtobus, metrodan da yersiz istifadə edirlər. Havalar da soyuyub, ehtiyac yoxdursa, hər kəs evində oturmalıdır ki, xəstələnməsin".

ZAİRA AKİFQIZI

Telegramda izləyin