Bu şəxslər 3 və 4-cü doza vaksini vurdurmalıdırlar - AÇIQLAMA

Artıq ölkəmizdə "COVID-19" vaksininin 3 və 4-cü dozanın vurulması haqqında qərar verilib. Digər tərəfdən, son günlər yoluxma sayında artım müşahidə olunmaqdadır. Hər iki doza vaksinasiya olunan şəxslər yoluxarsa, 3-cü və 4-cü dozanı vurdurmaya bilərlərmi?

Məsələ ilə bağlı Sonxeber.az-a infeksionist Nicat Əzimli açıqlama verib.

O bildirib ki, vaksinli şəxslərin də yoluxduğuna tez-tez rast gəlməyə başladığımıza görə belə nəticəyə gəlmək olar ki, vaksinasiyanın növbəti mərhələsində mRNT peyvəndlərinə, xüsusilə, vaxtı çatmış buster dozaların tətbiqinə üstünlük verilməlidir:

"Digər ölkələrlə müqayisədə, bizdə epidemik vəziyyət daha qənaətbəxş olsa da, hazırda yoluxma sayı 2000-i ötür və bir müddətdir ki, azalma dinamikasına keçə bilmirik. Bu da mübarizəni artırmağı, xüsusilə buster dozaya əhəmiyyətin verilməsini zəruri edir. Nəzərə alaq ki, Azərbaycanda ən geniş istifadə olunan vaksin "Coronavac"dır. Bu vaksinin də effektinin digərlərinə nisbətən daha qısamüddətli olduğu artıq elmə məlumdur. Bununla yanaşı, əhalinin 2 doza vaksin vurduran böyük bir qismi artıq 6 ayı geridə qoyub və orqanizmlərindəki spesifik immunitet zəifləyib və ya tamamilə itib. Bu səbəbdəndir ki, vaksinli şəxslərin də yoluxduğuna tez-tez rast gəlməyə başlamışıq. Buradan belə nəticəyə gəlmək olar ki, vaksinasiyanın növbəti mərhələsində mRNT peyvəndlərinə, xüsusilə, vaxtı çatmış buster dozaların tətbiqinə üstünlük verilməlidir".

ZAİRA AKİFQIZI

Telegramda izləyin