VAZ-la gecə saatlarında Bakıda avtoxuliqanlıq etdilər - VİDEO

Bakıda avtoxuliqanlıq edən sürücü qəza şəraiti yaradıb.

Oxu.Az xəbər verir ki, bu barədə görüntülər sosial şəbəkələrdə paylaşılıb.

Görüntülərdə VAZ-2107 markalı avtomobilin sürücüsünün avtoxuliqanlıq etdiyi açıq-aşkar görünür.

Ümumiyyətlə avtoxuliqanlıq edən sürücülər nəinki öz həyatlarına, eləcə də digər hərəkət iştirakçılarına ciddi təhlükə yaradırlar. Sürücülərin bu kimi davranışlara yol verməməsi üçün Dövlət Yol Polisi tərəfindən dəfələrlə maarifləndirici məlumatlar paylaşılıb, profilaktik söhbətlər aparılıb. Lakin görünən odur ki, hələ də sürücülər avtoxuliqanlıq edərək yol hərəkəti qaydalarını pozmaqda davam edirlər.

Qeyd edək ki, Azərbaycan Respublikasının İnzibati Xətalar Məcəlləsinin 511-ci maddəsinə (Avtoxuliqanlıq) əsasən, avtoxuliqanlıq, yəni nəqliyyat vasitəsinin sürücüsü tərəfindən ictimai qaydanı və əhalinin dincliyini nümayişkaranə şəkildə pozan, cəmiyyətə açıqca hörmətsizlik ifadə edən, yol hərəkəti qaydalarının müxtəlif üsullarla davamlı olaraq pozulması ilə müşayiət olunan qərəzli hərəkətlərə yol verən sürücüləri nəqliyyat vasitəsini idarə etmək hüququ bir il müddətinə məhdudlaşdırılmaqla 500 manatdan 750 manatadək cərimə gözləyir. Və ya nəqliyyat vasitəsini idarə etmək hüququ bir il müddətinə məhdudlaşdırılmaqla işin hallarına görə, pozuntunu törədənin şəxsiyyəti nəzərə alınmaqla, 15 gündən bir ayadək müddətə inzibati həbs cəzası düşür.

Telegramda izləyin