"OMİCRON" ştammı ölümcüldür? - AÇIQLAMA

Artıq 2 ildir ki, bütün dünya "COVID-19" xəstəliyi ilə mübarizə aparır. Bir xəstəlik bitmədən digər ştamlar yaranır. İndi isə artıq bir neçə ölkədə koronavirusun "Omicron" ştammı yayılmağa başlayıb. Bəs bu virus ölümcüldürmü? Müalicə üsulu digər variantlarla eynidirmi? Müalicədə hansı preparatlardan istifadə olunur?

Məsələ ilə bağlı Sonxeber.az-a infeksionist Nicat Əzimli açıqlama verib.

O bildirib ki, koronavirusun müalicəsində istifadə olunan dərmanların sayının az, effektinin isə çox olmasına, xüsusilə spesifik terapiyanın vaxtında və düzgün seçilməsinə diqqət olunmalıdır:

"Burada antiviral preparatlardan söhbət gedir. Hazırda Azərbaycanda geniş tətbiq olunan "Favipiravir", "Arbidol" kimi dərmanların effektinin olmaması artıq çoxdan öz təsdiqini tapıb. Bu sahədə yeni preparatların axtarışı dünyada davam etməkdədir. Bu yaxınlarda artıq dünyanın bir çox ölkəsi "Molnupiravir" adlı preparatın istehsalına başlamaq qərarını verib. Bu dərman vaxtında tətbiq olunsa, xəstəxanaya yatışlar 50% azala bilər. Hazırda belə və bundan daha effektiv dərmanların istifadəyə verilməsinə xeyli ehtiyac var.

Koronavirusun "Omicron" variantı ilə bağlı son məlumatlara görə, hələ ki, heç bir ölüm halı qeydə alınmayıb və xəstələrin əksəriyyətinin vəziyyəti qənaətbəxşdir. Lakin bu barədə dəqiq danışmaq üçün hələ çox tezdir. "Omicron"un törətdiyi xəstəliyin xarakteristikasının aparılması üçün bir neçə həftəlik müddətə ehtiyac var. Müalicəsində istifadə olunan dermanlar isə öncəki variantlarla eynidir".

ZAİRA AKİFQIZI

Telegramda izləyin