Uşaq "patı" çəkərsə... - Narkoloqdan AÇIQLAMA

Son zamanlar dillərdən düşməyən, xüsusilə gənclər arasında yayılan və "patı", "şüşə" adı ilə tanınan metamfetamin ailələrin qorxulu yuxusuna çevrilib.

Dünən barəsində xəbər verdiyimiz 11 yaşlı uşağın da narkotik istifadə etməsi, eyni zamanda küçələrdə qalması cəmiyyətdə xeyli narahatlıq doğurub.

Mövzuyla bağlı Sonxeber.az Bakı Şəhər Narkoloji Mərkəzin narkoloqu, Almaniyada təcrübə keçən həkim Pərvin Abbaslıdan münasibət öyrənib.

Narkoloqun sözlərinə görə, narkomaniya uşaqlarda daha ağır hallar yaradır:

"Sintetik narkotiklərin istifadəsi hazırda xeyli artıb. Təəssüf ki, narkomaniyanın yaşı getdikcə gəncləşir. Gənclərin və yeniyetmələrin arasında da bu artım var. 11 yaşlı bir uşağın narkotik qəbulu tez-tez rast gəlinən bir hal deyil. Onlarda böyüklərdə yaranan psixoz, hallüsinasiyaların daha kəskin forması yaranacaq. Çünki uşaq orqanizmi tam formalaşmamış bir orqanizmdir. Bu səbəbdən onlarda daha ağır hallara rast gəlinəcək.

Bu özlüyündə təbii ki, panikaya, ajiotaja, qeyri-adi davranışlara gətirib çıxara bilər".

Aysel SƏFƏRZADƏ

Telegramda izləyin