"Şəhid olsam, oğluma velosiped alın" deyən Ülvü Hüseynovun xatirəsi əbədiləşdirildi - FOTO-VİDEO

44 günlük Vətən müharibəsində bizə öz canı bahasına qələbə bəxş edənlərdən biri də Hüseynov Ülvü Möhsün oğludur.

Sonxeber.az xəbər verir ki, bu gün onun adına bulağın açılışı olub.

Döyüş yoldaşlarına "Şəhid olsam, mənim adımdan oğluma velosiped alarsınız" deyərək hər kəsi kövrəldən bu qəhrəmanımız 16 aprel 1988-ci il tarixində Ordubad rayonu Sabirkənd kəndində kasıb bir ailədə dünyaya gəlib.

Ülvü 8-ci sinifə qədər həmin kəndin M.Ə.Rəsulzadə adına 11 illik məktəbində oxuyub. 8-ci sinfi bitirdikdən sonra C.Naxçıvanski adına Hərbi liseyə daxil olub, oranı bitirdikdən sonra isə H.Əliyev adına Ali Ümumqoşun Komandirləri Məktəbinə daxil olaraq leytenant rütbəsi alıb.

Ali Hərbi Məktəbi bitirdikdən sonra Tərtər rayonunun düşmənlə təmas xəttində yerləşən "N" saylı Hərbi hissəsində əvvəlcə bölük komandiri, sonra tağım komandiri vəzifəsində xidmətini şərəflə yerinə yetirib.

Xidməti dövründə həmişə düşmənlə üz-üzə olan hərbi hissələrdə xidmət edib, aprel döyüşlərində fəal iştirak edərək yaralanıb və ən sonda Beyləqan rayonu ərazisində yerləşən hərbi hissədə taborun qərargah rəisi, 2-ci Qarabağ müharibəsində isə tabor komandiri vəzifəsində işləyib.

Qəhrəman komandirin döyüş yolu Füzuli, Zəngilan, Cəbrayıl, Hadrut, Xocavənd, Şuşa rayonlarından keçib və 2020-ci ilin noyabr ayının 7-də o, Şuşa şəhərinin azad olunması uğrunda döyüşərkən düşmənin snayper atəşinə tuş gələrək qəhrəmancasına şəhid olub.

Şəhid komandir Ülvü Hüseynov şərəfli xidmət illərində müxtəlif medallarla təltif olunub, Vətən müharibəsində isə "Füzulinin azad olunmasına görə", "Cəbrayılın azad olunmasına görə", "Hadrutun azad olunmasına görə", "Xocavəndin azad olunmasına görə", "Şuşanın azad olunmasına görə", "İgidliyə görə", "Şücayətə görə", "Vətənə xidmətə görə" medalları və "Qarabağ" ordeninə layiq görülüb.

Şəhid komandirin Vətənə əmanət qoyduğu Nihat adlı yadigar bir oğlu vardır.

Allah bütün şəhidlərimizə rəhmət eləsin.

ZAİRA AKİFQIZI

Telegramda izləyin