"Prezidentin Ukraynaya səfəri dost xalqların inkişafında mühüm rol oynayacaq" - Deputat

"Azərbaycanla Ukrayna strateji tərəfdaş, dost ölkələrdir və bir-birilərinin xarici siyasətində əhəmiyyətli yer tuturlar".

Bunu Sonxeber.az-a açıqlamasında deputat Nəsib Məhəməliyev bildirib.

Deputat qeyd edib ki, cənab Prezident İlham Əliyevin Ukraynaya növbəti səfəri, münasibətlərdə yeni perspektivlər açıb və kifayət qədər məhsuldar olub:

"Dövlət başçıları İlham Əliyev və Vladimir Zelenski tərəfindən strateji tərəfdaşlığın dərinləşməsinə yönəlik Birgə Bəyannamə imzalanıb. Enerji, hərbi-texniki, müdafiə sənayesi, infrastruktur, nəqliyyat, aqrar-sənaye, ticarət, investisiya, ərzaq təhlükəsizliyi və digər sahələrdə əməkdaşlığın aktivləşdirilməsi barədə razılıq əldə olunub. Ukrayna-Azərbaycan ticarət əlaqələri sürətlə inkişaf edir. Ötən il ticarət dövriyyəsi 1 milyard ABŞ dollarına çatıb. Növbəti illərdə ticarət həcmini ikiqat artırmaq qərara alınıb. Mövcud Rusiya-Ukrayna münasibətlərini nəzərə alsaq, burada böyük bir potensialın olduğunu görə bilərik.

Azərbaycan, Ukrayna, Gürcüstan və Moldovanın daxil olduğu GUAM çərçivəsində nəqliyyat dəhlizinin yaradılması istiqamətində işlər aparılacaq.

Azərbaycan şirkətlərinin Ukraynada, Ukrayna şirkətlərinin Azərbaycanda fəaliyyət göstərməsi üçün müvafiq şərait yaradılacaq.

Bütövlükdə, cənab Prezidentin Ukraynaya səfəri siyasi, iqtisadi məzmununa görə zəngin olub və hər iki dost ölkənin, dost xalqların inkişafında mühüm rol oynayacaq".

Aysel Yusifqızı

Telegramda izləyin